കാണാത്ത കാഴ്ചകൾ സമ്മാനിക്കാൻ എബ്രിഡ് ഷൈൻ- നിവിൻ പോളി- ആസിഫ് അലി ടീം; മഹാവീര്യർ ടീസർ കാണാം ..!

മലയാള സിനിമ പ്രേമികൾ ഏറെനാളായി കാത്തിരിക്കുന്ന ഒരു ചിത്രമാണ് മഹാവീര്യർ. 1983 , ആക്ഷൻ ഹീറോ ബിജു, പൂമരം, കുങ്ഫു മാസ്റ്റർ എന്നിവക്ക് ശേഷം സൂപ്പർ ഹിറ്റ് സംവിധായകൻ എബ്രിഡ് ഷൈൻ ഒരുക്കിയ ഈ ചിത്രത്തിൽ നിവിൻ പോളി- ആസിഫ് അലി എന്നിവരാണ് പ്രധാന വേഷങ്ങളിൽ എത്തുന്നത്. അധികം സ്റ്റില്ലുകൾ പോലും പുറത്തു വിടാതെ കേരളത്തിന് പുറത്തു ഷൂട്ട് ചെയ്ത ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ തന്നെ പ്രേക്ഷകരെ ഞെട്ടിച്ചിരുന്നു. കാരണം, അത്രയ്ക്ക് വ്യത്യസ്തമായ, ഇതുവരെ നമ്മൾ കാണാത്ത ഒരു രൂപത്തിലും ഭാവത്തിലുമാണ് നിവിൻ പോളി, ആസിഫ് അലി എന്നിവരെ ആ പോസ്റ്ററിൽ കാണാൻ സാധിക്കുക. ഇപ്പോഴിതാ ഈ ചിത്രത്തിന്റെ ആദ്യ ടീസർ ഇന്ന് റിലീസ് ചെയ്തിരിക്കുകയാണ്. ഫസ്റ്റ് ലുക്ക് പോസ്റ്റർ പോലെ തന്നെ പ്രേക്ഷകരിൽ ആകാംഷയും ആവേശവും കൗതുകവും നിറക്കുന്ന ഒരു ടീസർ ആണ് ഇപ്പോൾ പുറത്തു വന്നിരിക്കുന്നത്.

പ്രശസ്ത മലയാള സാഹിത്യകാരൻ എം മുകുന്ദൻ രചിച്ച കഥയെ അടിസ്ഥാനമാക്കി ഒരുക്കിയ ഈ ചിത്രത്തിന് തിരക്കഥ രചിച്ചിരിക്കുന്നതും സംവിധായകൻ എബ്രിഡ് ഷൈൻ ആണ്. ലാൽ, സിദ്ദിഖ്, ലാലു അലക്സ്, വിജയ് മേനോൻ, കൃഷ്ണ പ്രസാദ്, മേജർ രവി, സുധീർ കരമന, മല്ലിക സുകുമാരൻ, പദ്മരാജൻ എന്നിവരും അഭിനയിച്ച ഈ ചിത്രത്തിലെ നായികാ വേഷം ചെയ്തിരിക്കുന്നത് പ്രശസ്ത കന്നഡ നടി ഷാൻവി ശ്രീവാസ്തവയാണ്. പോളി ജൂനിയർ പിക്‌ചേഴ്‌സിന്റെ ബാനറിൽ നിവിൻ പോളിയും ഇന്ത്യൻ മൂവി മേക്കേഴ്സിന്റെ ബാനറിൽ ഷംനാസും ചേർന്ന് നിർമ്മിച്ച ഈ ചിത്രത്തിന് ഇഷാൻ ചാബ്ര സംഗീതവും ചന്ദ്രമോഹൻ സെൽവരാജ് ഛായാഗ്രഹണവും മനോജ് എഡിറ്റിങ്ങും നിർവഹിച്ചിരിക്കുന്നു.