സൗഹൃദത്തിന്റെ മനോഹരമായ മെലഡിയുമായി സാറ്റർഡേ നൈറ്റ്; ആദ്യ ഗാനമെത്തി, വീഡിയോ കാണാം

യുവ താരം നിവിൻ പോളി നായകനായി എത്തുന്ന ഏറ്റവും പുതിയ ചിത്രമാണ് സാറ്റർഡേ നൈറ്റ്. റോഷൻ ആൻഡ്രൂസ് സംവിധാനം ചെയ്ത ഈ ചിത്രം വരുന്ന ഒക്ടോബറിലാണ് റിലീസ് ചെയ്യാൻ പോകുന്നത്. ഇതിനോടകം തന്നെ ഈ ചിത്രത്തിന്റെ ടീസർ, ട്രൈലെർ, പോസ്റ്റർ എന്നിവയെല്ലാം സോഷ്യൽ മീഡിയയുടെ ശ്രദ്ധ നേടിക്കഴിഞ്ഞു. ഇപ്പോഴിതാ ഇതിലെ ആദ്യ ഗാനം കൂടി പ്രേക്ഷകരുടെ മുന്നിലെത്തിക്കഴിഞ്ഞു. സൗഹൃദമാഘോഷിക്കുന്ന ഒരു മനോഹരമായ മെലഡിയാണ് ഇപ്പോൾ അവർ പുറത്ത് വിട്ടിരിക്കുന്നത്. നിലാത്തുമ്പി നീ എന്ന വരികളോടെ തുടങ്ങുന്ന ഈ ഗാനം രചിച്ചത് ജോ പോളും ഇതിനു സംഗീതം നൽകിയത് ജേക്സ് ബിജോയിയും ആണ്. വിജയ് യേശുദാസ് ആലപിച്ച ഈ ഗാനത്തിന്റെ ലിറിക് വീഡിയോയാണ് ഇപ്പോൾ പുറത്തു വന്നിരിക്കുന്നത്. ഈ ചിത്രത്തിന്റെ പ്രമോഷൻ പരിപാടികളുമായി ഇപ്പോൾ കേരളം മുഴുവൻ സഞ്ചരിക്കുകയാണ് നിവിൻ പോളി ഉൾപ്പെടെയുള്ള താരനിര.

നിവിൻ പോളിക്കൊപ്പം അജു വർഗീസ്, സിജു വിൽസൺ, സൈജു കുറുപ്പ്, ഗ്രേസ് ആന്റണി, മാളവിക ശ്രീനാഥ് , സാനിയ ഇയ്യപ്പൻ എന്നിവരും വേഷമിടുന്ന ഈ ചിത്രം ഒരു കോമഡി ത്രില്ലറായാണ് ഒരുക്കിയിരിക്കുന്നതെന്ന സൂചനയാണ് ഇതിന്റെ പോസ്റ്ററുകൾ, ടീസർ, ട്രെയ്‌ലർ നൽകിയിരിക്കുന്നത്. എ ബി സി ഡി, അനുരാഗ കരിക്കിൻ വെള്ളം എന്നീ ഹിറ്റ് ചിത്രങ്ങൾ രചിച്ച നവീൻ ഭാസ്കർ തിരക്കഥ രചിച്ച ഈ ബിഗ് ബഡ്ജറ്റ് ചിത്രം വിനായക ഫിലിംസിന്റെ ബാനറിൽ അജിത് വിനായകയാണ് നിർമ്മിച്ചിരിക്കുന്നത്. സ്റ്റാൻലി എന്ന് പേരുള്ള ഒരു കഥാപാത്രമായാണ് നിവിൻ പോളി ഇതിലഭിനയിച്ചിരിക്കുന്നത്. അസ്‌ലം കെ പുരയിൽ ദൃശ്യങ്ങളൊരുക്കിയ ഈ ചിത്രം എഡിറ്റ് ചെയ്തത് ടി ശിവാനന്ദേശ്വരൻ ആണ്.