ബിജിപാലിന്റെയും ദീപക് ദേവിന്റെയും മക്കൾ ആലപിച്ച ജോണി ജോണി യെസ് അപ്പയിലെ പുതിയ ഗാനം മികച്ച പ്രേക്ഷക പ്രതികരണം നേടുന്നു..!

കുഞ്ചാക്കോ ബോബൻ നായകനായി എത്തുന്ന പുതിയ ചിത്രമാണ് ജോണി ജോണി യെസ് അപ്പ. പാവാടയ്ക്ക് ശേഷം മാർത്താണ്ഡൻ സംവിധാനം ചെയ്ത ഈ ഫാമിലി കോമഡി എന്റെർറ്റൈനെർ ഈ മാസം അവസാന വാരം റിലീസ് ചെയ്യും. ഇതിന്റെ ട്രൈലെർ വലിയ പ്രേക്ഷക ശ്രദ്ധ നേടിയതിനു പിന്നാലെ ഇപ്പോൾ ഈ ചിത്രത്തിലെ ഒരു ഗാനവും വലിയ പ്രേക്ഷക പ്രീതി നേടിയെടുക്കുകയാണ്. ഇന്നലെ റിലീസ് ചെയ്ത അരികെ ആരോ എന്ന എന്ന സോങ് വീഡിയോ ആണ് ഇപ്പോൾ സോഷ്യൽ മീഡിയയുടെ ശ്രദ്ധ നേടുന്നത്. ഷാൻ റഹ്മാൻ ഈണം നൽകിയ ഈ ഗാനം ആലപിച്ചിരിക്കുന്നത് പ്രശസ്ത സംഗീത സംവിധായകൻ ബിജിപാലിന്റെ മകൻ ആയ ദേവദത് ബിജിപാലും മറ്റൊരു സംഗീത സംവിധായകനായ ദീപക് ദേവിന്റെ മകൾ ആയ ദേവിക ദീപക് ദേവും ആണ്.

ബി കെ ഹരിനാരായണൻ ആണ് ഈ ഗാനത്തിന്റെ വരികൾ രചിച്ചിരിക്കുന്നത്. മാസ്റ്റർ സനൂപ് സന്തോഷും, അനിഖയുമാണ് ഈ ഗാനത്തിൽ അഭിനയിച്ചിരിക്കുന്നത്. രസകരമായ ഒരു പ്രണയ ഗാനമായാണ് ഈ പാട്ടു ഒരുക്കിയിരിക്കുന്നത്. ഈ ചിത്രം രചിച്ചിരിക്കുന്നത് വെള്ളിമൂങ്ങ എന്ന ബ്ലോക്ക്ബസ്റ്റർ ബിജു മേനോൻ- ജിബു ജേക്കബ് ചിത്രം എഴുതിയ ജോജി തോമസ് ആണ്. പ്രശസ്ത നിർമ്മാതാവായ വൈശാഖ് രാജൻ ആണ് തന്റെ വൈശാഖ സിനിമയുടെ ബാനറിൽ ഈ ചിത്രം നിർമ്മിച്ചിരിക്കുന്നത്. അനു സിത്താരയും മമത മോഹൻദാസും നായികാ വേഷങ്ങൾ ചെയ്യുന്ന ഈ ചിത്രത്തിൽ ഷറഫുദീൻ , വിജയ രാഘവൻ, ഗീത, എന്നിവരും പ്രധാന വേഷങ്ങൾ ചെയ്തിരിക്കുന്നു. കലാഭവൻ ഷാജോൺ, അബു സലിം, ടിനി ടോം, വീണ നായർ, ലെന, നെടുമുടി വേണു തുടങ്ങി ഒരു വലിയ താര നിര തന്നെ ഈ ചിത്രത്തിൽ അണിനിരന്നിട്ടുണ്ട്.