സൂപ്പർ ഹിറ്റായ ആദ്യഗാനത്തിന് ശേഷം തരംഗമാകാൻ നാമിലെ രണ്ടാം ഗാനം എത്തി..

നവാഗതനായ ജോഷി തോമസ് പള്ളിക്കൽ സംവിധാനം ചെയ്ത ചിത്രമാണ് നാം. ക്യാമ്പസ് കഥ പറയുന്ന ചിത്രത്തിൽ ശബരീഷ് വർമ്മ, രാഹുൽ മാധവ് എന്നിവരാണ് ചിത്രത്തിലെ നായക വേഷത്തിൽ എത്തുന്നത്. അതിഥി രവി, ഗായത്രി സുരേഷ്, മറീന മൈക്കിൾ തുടങ്ങിയവരാണ് ചിത്രത്തിലെ നായികമാരായി എത്തിയിരിക്കുന്നത്. നോബി, തമ്പി ആൻറണി, നിരഞ്ജൻ സുരേഷ് തുടങ്ങിയവരും ചിത്രത്തിൽ അഭിനയിച്ചിരിക്കുന്നു. ചിത്രത്തിന്റേതായി പുറത്തിറങ്ങിയ ട്രെയിലർ വളരെയധികം ശ്രദ്ധയാകർഷിച്ചിരുന്നു. ടോവിനോ തോമസ് ഗൗതം വാസുദേവ് മേനോൻ തുടങ്ങിയവർ ട്രെയിലറിൽ പ്രത്യക്ഷപ്പെട്ടിരുന്നു ഗൗതം വാസുദേവ മേനോൻ മലയാളത്തിൽ അഭിനയിക്കുന്ന ആദ്യ ചിത്രം കൂടിയാണ് ഇത്. ചിത്രത്തിന്റേതായി ആദ്യം പുറത്തിറങ്ങിയ ഗാനം വളരെയധികം തരംഗം സൃഷ്ടിച്ചിരുന്നു. 15 ലക്ഷത്തിൽപരം കാഴ്ചക്കാരെ സ്വന്തമാക്കിയ ആദ്യ ഗാനത്തിനുശേഷം രണ്ടാം ഗാനം ഇന്ന് പുറത്തിറങ്ങുമെന്ന് അറിയിച്ചിരുന്നു.

അഴകിൻ ചെന്നൈ എന്നു തുടങ്ങുന്ന അതിമനോഹര ഗാനം ആണ് ഇപ്പോൾ പുറത്തുവന്നിരിക്കുന്നത്. നവാഗതരായ അശ്വിൻ, സന്ദീപ് എന്നിവർ ചേർന്നാണ് ഗാനത്തിന് സംഗീതം നൽകിയിരിക്കുന്നത്. ചിത്രത്തിലെ അഭിനേതാവ് കൂടിയായ നിരഞജ് സുരേഷ് തന്നെയാണ് ഗാനം ആലപിച്ചിരിക്കുന്നത്. മോഹൻ രാജാണ് ചിത്രത്തിലെ ഗാനങ്ങൾക്ക് വരികളെഴുതിയിരിക്കുന്നത്. എല്ലാരും ഒന്നാണ് എന്നു തുടങ്ങുന്ന ആദ്യ ഗാനത്തെ പോലെ തന്നെ മികച്ച ഗാനവും പ്രേക്ഷകർ ഏറ്റെടുക്കുമെന്നാണ് പ്രതീക്ഷിക്കുന്നത്. കാർത്തിക് നല്ല മുത്തു ആണ് ചിത്രത്തിൻറെ ഛായാഗ്രഹണം നിർവഹിച്ചിരിക്കുന്നത്. ജെ. ടി. പി ഫിലിംസ് നിർമ്മിച്ച ചിത്രം മെയ് ആദ്യ വാരം തിയേറ്ററുകളിലെത്തും.