ദയയില്ലാത്ത നീതിയുമായി മോൺസ്റ്റർ വരുന്നു; മോഹൻലാൽ- വൈശാഖ് ചിത്രത്തിന്റെ ട്രൈലെർ ഇതാ

മലയാളത്തിന്റെ മഹാനടൻ കംപ്ലീറ്റ് ആക്ടർ മോഹൻലാൽ നായകനായി എത്തുന്ന ഏറ്റവും പുതിയ ചിത്രമായ മോൺസ്റ്റർ റിലീസിനൊരുങ്ങുന്നു. അതിന്റെ ഭാഗമായി ഈ ത്രില്ലർ ചിത്രത്തിന്റെ ട്രൈലെർ ഇന്ന് രാവിലെ പതിനൊന്ന് മണിക്ക് പ്രേക്ഷകരുടെ മുന്നിലെത്തി. മോൺസ്റ്റർ ഒരു ആക്ഷൻ- ഇൻവെസ്റ്റിഗേഷൻ ത്രില്ലറാണെന്ന സൂചനയാണ് ഇതിന്റെ ട്രൈലെർ തരുന്നത്. പുലിമുരുകൻ എന്ന ഇൻഡസ്ട്രി ഹിറ്റ് ചിത്രത്തിന് ശേഷം മോഹൻലാൽ- വൈശാഖ് ടീമൊന്നിച്ച ഈ ചിത്രം രചിച്ചത് പുലിമുരുകൻ രചിച്ച ഉദയ കൃഷ്ണ തന്നെയാണ്. ഈ വരുന്ന ഒക്ടോബർ ഇരുപത്തിയൊന്നിന് ആഗോള റിലീസായി എത്തുന്ന മോൺസ്റ്റർ ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് നിർമ്മിച്ചിരിക്കുന്നത്. സതീഷ് കുറുപ്പ് ക്യാമറ ചലിപ്പിച്ചിരിക്കുന്ന ഈ ചിത്രത്തിന് എഡിറ്റിംഗ് നിർവഹിച്ചിരിക്കുന്നത് ഷമീർ മുഹമ്മദാണ്.

ദീപക് ദേവാണ് ഇതിന് സംഗീതമൊരുക്കിയിരിക്കുന്നത്. മോഹൻലാലിനൊപ്പം ജോണി ആന്റണി, കോട്ടയം രമേശ്, സുദേവ് നായർ, ഹണി റോസ്, ഗണേഷ് കുമാർ, സിദ്ദിഖ്, ലക്ഷ്മി മഞ്ചു, ലെന, ഇടവേള ബാബു തുടങ്ങി ഒരുപിടി പ്രശസ്ത താരങ്ങൾ ഈ ചിത്രത്തിൽ അണിനിരക്കുന്നുണ്ട്. ലക്കി സിങ് എന്ന കഥാപാത്രമായാണ് ഈ ചിത്രത്തിൽ മോഹൻലാൽ എത്തിയിരിക്കുന്നത്. എന്താണ് സംഭവിക്കുന്നതെന്ന് പ്രേക്ഷകർക്ക് ഒരു സൂചനയും നൽകാത്ത രീതിയിലാണ് ഈ ചിത്രത്തിന്റെ ട്രൈലെർ ഒരുക്കിയിരിക്കുന്നത്. ഏതായാലൂം സിനിമാ പ്രേമികളെ ത്രില്ലടിപ്പിക്കുന്ന ഒരു ചിത്രമാകും മോൺസ്റ്ററെന്ന ഫീലാണ് ട്രൈലെർ നമ്മുക്ക് തരുന്നത്. മലയാളത്തിൽ അധികം ചർച്ച ചെയ്യാത്ത ഒരു പ്രമേയമാണ് ഈ ചിത്രം ചർച്ച ചെയ്യുന്നതെന്ന് മോഹൻലാൽ വെളിപ്പെടുത്തിയിരുന്നു. തന്റെ കരിയറിൽ താൻ ഇതുവരെ ചെയ്യാത്ത തരത്തിലുള്ള ഒരു ചിത്രമാണിതെന്ന് വൈശാഖും പറയുന്നു.