മരണ മാസ്സ് ട്രൈലെറുമായി പേട്ട; തലൈവർക്കൊപ്പം മക്കൾ സെൽവനും..!

ലോകമെമ്പാടുമുള്ള സൂപ്പർ സ്റ്റാർ ആരാധകർ കാത്തിരുന്ന പേട്ട ട്രൈലെർ ഇന്ന് റിലീസ് ചെയ്തു കഴിഞ്ഞു. സൂപ്പർ സ്റ്റാർ രജനികാന്തിനെ നായകനാക്കി പ്രശസ്ത സംവിധായകൻ കാർത്തിക് സുബ്ബരാജ് രചിച്ചു സംവിധാനം ചെയ്ത ഈ ചിത്രത്തിന്റെ ഒരു മരണ മാസ്സ് ട്രൈലെർ ആണ് ഇപ്പോൾ റിലീസ് ചെയ്തിരിക്കുന്നത്. വിന്റേജ് രജനികാന്തിനെ ആണ് നമ്മുക്ക് ട്രെയ്ലറിൽ കാണാൻ കഴിയുന്നത്. സൂപ്പർ സ്റ്റാറിനൊപ്പം മക്കൾ സെൽവൻ വിജയ് സേതുപതിയുടെയും ത്രസിപ്പിക്കുന്ന സാന്നിധ്യമാണ് ഈ ട്രെയ്ലറിന്റെ ഹൈലൈറ്റ് എന്ന് പറയാം. ബോബി സിംഹ, നവാസുദ്ധീന് സിദ്ദിഖി, സിമ്രാൻ, തൃഷ എന്നിവരും അഭിനയിക്കുന്ന ഈ മാസ്സ് എന്റെർറ്റൈനെർ പൊങ്കൽ റിലീസ് ആയി ജനുവരി പത്തിന് ലോകം മുഴുവൻ റിലീസ് ചെയ്യും.

സൺ പിക്‌ചേഴ്‌സിന്റെ ബാനറിൽ കലാനിധി മാരൻ ആണ് ഈ ചിത്രം നിർമ്മിച്ചിരിക്കുന്നത്. ഈ ചിത്രത്തിന് വേണ്ടി അനിരുദ്ധ് രവിചന്ദർ ഈണം പകർന്ന ഗാനങ്ങൾ ഇതിനോടകം തന്നെ വമ്പൻ ഹിറ്റായി കഴിഞ്ഞു. തിരു ഛായാഗ്രഹണം നിർവഹിച്ച ഈ ചിത്രത്തിന് സംഘട്ടനം ഒരുക്കിയത് പീറ്റർ ഹെയ്‌നും പേട്ട എഡിറ്റ് ചെയ്തിരിക്കുന്നത് വിവേക് ഹർഷനും ആണ്. കിടിലൻ ലുക്കിൽ ആണ് സൂപ്പർ സ്റ്റാർ രജനികാന്ത് ഈ ചിത്രത്തിൽ പ്രത്യക്ഷപ്പെട്ടിരിക്കുന്നത്. തലൈവരുടെ സ്റ്റൈലും ആക്ഷനും മാസ്സ് ഡയലോഗുകളും പാട്ടും നൃത്തവും എല്ലാം ഉൾപ്പെടുത്തിയ ഒരു പക്കാ മാസ്സ് ആക്ഷൻ എന്റെർറ്റൈനെർ തന്നെയായിരിക്കും പേട്ട എന്ന സൂചന ട്രൈലെർ നൽകുന്നുണ്ട്. സൂപ്പർ സ്റ്റാറിന്റെ വില്ലൻ ആയാണ് വിജയ് സേതുപതി ഈ ചിത്രത്തിൽ എത്തുന്നത് എന്ന പ്രത്യേകതയും ഇതിനുണ്ട്. ജിത്തു എന്ന കഥാപാത്രം ആയാണ് വിജയ് സേതുപതി ഇതിൽ എത്തുന്നത്.