അതീവ സുന്ദരിയായി ദീപ്തി സതി; പത്തൊൻപതാം നൂറ്റാണ്ടിലെ പുതിയ ഗാനം കാണാം

സൂപ്പർ ഹിറ്റ് സംവിധായകൻ വിനയനൊരുക്കിയ ഏറ്റവും പുതിയ ചിത്രമാണ് പത്തൊൻപതാം നൂറ്റാണ്ട്. ബ്രഹ്മാണ്ഡ ബഡ്ജറ്റിൽ ഒരുക്കിയ ഈ ചരിത്ര സിനിമയിൽ യുവ താരം സിജു വിൽസനാണ് നായകനായി എത്തുന്നത്. സെപ്റ്റംബർ എട്ടിന് ഓണം റിലീസായി എത്തുന്ന ഇതിന്റെ ടീസർ, ട്രയ്ലർ, ഒരു ഗാനം എന്നിവ സൂപ്പർ ഹിറ്റായി മാറിയിരുന്നു. അതിനൊപ്പം തന്നെ ഈ ചിത്രത്തിന്റെ മേക്കിങ് വീഡിയോയും ശ്രദ്ധ നേടി. ഇപ്പോഴിതാ ഇതിലെ പുതിയ വീഡിയോ ഗാനമാണ് റിലീസ് ചെയ്തിരിക്കുന്നത്. സാവിത്രി എന്ന കഥാപാത്രമായി എത്തുന്ന ദീപ്തി സതിയുടെ നൃത്തമാണ്, മയിൽപ്പീലി ഇളകുന്നു എന്ന വരികളോടെ തുടങ്ങുന്ന ഈ ഗാനത്തിന്റെ ഹൈലൈറ്റ്. അതീവ സുന്ദരിയായാണ് ദീപ്തി സതി ഈ ഗാനത്തിൽ പ്രത്യക്ഷപ്പെട്ടിരിക്കുന്നത്. അതിമനോഹരമായ സെറ്റിൽ ഒരുക്കിയ ഈ ഗാനം ആലപിച്ചിരിക്കുന്നത് മൃദുല വാര്യർ, കെ എസ് ഹരിശങ്കർ എന്നിവർ ചേർന്നാണ്.

എം ജയചന്ദ്രൻ ഈണം നൽകിയ ഈ ഗാനത്തിന് വരികൾ രചിച്ചത് റഫീഖ് അഹമ്മദാണ്. അനൂപ് മേനോൻ, സുദേവ് നായർ, സുരേഷ് കൃഷ്ണ. ചെമ്പൻ വിനോദ്, ഇന്ദ്രൻസ്, സെന്തിൽ കൃഷ്ണ, സുധീർ കരമന, ടിനി ടോം, വിഷ്ണു വിനയ്, പൂനം ബജ്വ, നിർമ്മാതാവ് ഗോകുലം ഗോപാലൻ എന്നിവരും വേഷമിട്ട ഈ ചിത്രത്തിന് ക്യാമറ ചലിപ്പിച്ചത് ഷാജി കുമാറും പശ്‌ചാത്തല സംഗീതമൊരുക്കിയത് സന്തോഷ് നാരായണനുമാണ്. മലയാളം കൂടാതെ തമിഴ്, തെലുങ്ക്, കന്നഡ, ഹിന്ദി ഭാഷകളിലും റിലീസ് ചെയ്യാൻ പോകുന്ന ഈ ചിത്രം ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് നിർമ്മിച്ചിരിക്കുന്നത്. ആറാട്ടുപുഴ വേലായുധ പണിക്കരെന്ന യോദ്ധാവായ നായക കഥാപാത്രമായാണ് സിജു വിൽസൻ ഈ ചിത്രത്തിൽ അഭിനയിച്ചിരിക്കുന്നത്. വിവേക് ഹർഷനാണ് പത്തൊൻപതാം നൂറ്റാണ്ടിന്റെ എഡിറ്റർ.