ആക്ഷൻ സൂപ്പർസ്റ്റാറിന്റെ സൂപ്പർ ഹിറ്റ് ചിത്രം പാപ്പൻ ഇനി ഒടിടിയിലും; റിലീസ് തീയതി എത്തി

ആക്ഷൻ സൂപ്പർ സ്റ്റാർ സുരേഷ് ഗോപിയെ നായകനാക്കി മാസ്റ്റർ ഡയറക്ടർ ജോഷി ഒരുക്കിയ ചിത്രമാണ് പാപ്പൻ. ജൂലൈ അവസാനം റിലീസ് ചെയ്ത ഈ ചിത്രം ഈ വർഷത്തെ സൂപ്പർ ഹിറ്റുകളിൽ ഒന്നായി മാറി. 30 കോടിയോളം രൂപയുടെ ആഗോള കളക്ഷൻ നേടിയ പാപ്പൻ, ടോട്ടൽ ബിസിനസായി അമ്പത് കോടിയോളം നേടിയെന്നാണ് റിപ്പോർട്ടുകൾ പറയുന്നത്. ഏതായാലും തീയേറ്ററിലെ മികച്ച പ്രകടനത്തിന് ശേഷം ഈ ചിത്രം ഇപ്പോൾ ഒടിടി സ്ട്രീമിങ്ങിന് കൂടിയൊരുങ്ങുകയാണ്. ഈ വരുന്ന സെപ്റ്റംബർ ഏഴു മുതൽ സീ ഫൈവിലാണ് പാപ്പൻ സ്ട്രീം ചെയ്യാൻ പോകുന്നത്. എബ്രഹാം മാത്യു മാത്തനെന്ന റിട്ടയേർഡ് പോലീസ് ഓഫീസറായി സുരേഷ് ഗോപി അഭിനയിച്ചിരിക്കുന്ന ഈ ചിത്രം രചിച്ചത് ആർ ജെ ഷാനാണ്. സുരേഷ് ഗോപിയുടെ കരിയറിലെ തന്നെ ഏറ്റവും വലിയ സോളോ ഹിറ്റാണ് പാപ്പൻ.

ഡേവിഡ് കാച്ചപ്പിള്ളി പ്രൊഡക്ഷൻസിന്റെയും ഇഫാർ മീഡിയയുടെയും, ശ്രീ ഗോകുലം മൂവീസിന്റെയും ബാനറിൽ യഥാക്രമം ഡേവിഡ് കാച്ചപ്പിള്ളിയും റാഫി മതിരയും ഗോകുലം ഗോപാലനും ചേർന്ന് നിർമ്മിച്ച ഈ ചിത്രത്തിൽ വമ്പൻ താരനിരയാണ് അണിനിരന്നത്. സുരേഷ് ഗോപിക്ക് പുറമെ നീത പിള്ളൈ, ഗോകുൽ സുരേഷ്, ഷമ്മി തിലകൻ, നൈല ഉഷ, ആശ ശരത്, കനിഹ, അജ്മൽ അമീർ, മാളവിക മേനോൻ, വിജയ രാഘവൻ, ടിനി ടോം, ശ്രീജിത്ത് രവി, സാധിക വേണുഗോപാൽ, അഭിഷേക് രവീന്ദ്രൻ, ചന്ദുനാഥ്, ഡയാന ഹമീദ്, ജുവൽ മേരി എന്നിവരാണ് ഇതിലെ പ്രധാന വേഷങ്ങൾ ചെയ്തത്. ജേക്സ് ബിജോയ് സംഗീതമൊരുക്കിയ ഈ ചിത്രത്തിന് ക്യാമറ ചലിപ്പിച്ചത് അജയ് ഡേവിഡ് കാച്ചപ്പിള്ളിയും ഈ ചിത്രം എഡിറ്റ് ചെയ്തത് ശ്യാം ശശിധരനുമാണ്.