റുബിക്സ് ക്യൂബുകൾ കൊണ്ടൊരു മരക്കാർ പോസ്റ്റർ വിസ്മയം; വീഡിയോ കാണാം..!

ഇന്ത്യൻ സിനിമയുടെ കംപ്ലീറ്റ് ആക്ടർ മോഹൻലാൽ നായകനായി എത്തുന്ന, മലയാള സിനിമയുടെ ചരിത്രത്തിലെ ഏറ്റവും വലിയ ചിത്രമാണ് മരക്കാർ അറബിക്കടലിന്റെ സിംഹം. ദേശീയ അവാർഡ് ജേതാവ് കൂടിയായ പ്രശസ്ത സംവിധായകൻ പ്രിയദർശൻ ഒരുക്കിയ ഈ ചിത്രം ഈ വരുന്ന ഡിസംബർ രണ്ടു മുതൽ ആഗോള റിലീസായി എത്തുകയാണ്. മലയാളം, തമിഴ്, കന്നഡ, ഹിന്ദി, തെലുങ്കു ഭാഷകൾക്ക് പുറമെ ഇംഗ്ലീഷിലും എത്തുന്ന ഈ ചിത്രം മലയാള സിനിമയുടെ ചരിത്രത്തിലെ തന്നെ ഏറ്റവും വലിയ റിലീസ് മാമാങ്കത്തിന് ആണ് ഒരുങ്ങുന്നത്. ചിത്രത്തെ വരവേൽക്കാൻ മലയാള സിനിമ ഇതുവരെ കാണാത്ത തരത്തിലുള്ള ആഘോഷ പരിപാടികളുമായി മോഹൻലാൽ ആരാധകരും മുന്നിട്ടിറങ്ങി കഴിഞ്ഞു. ആയിരത്തോളം ഫാൻസ്‌ ഷോകൾ എന്ന അപൂർവ റെക്കോർഡ് ലക്ഷ്യമാക്കി നീങ്ങുന്ന ഈ ചിത്രം അഡ്വാൻസ് ബുക്കിങ്ങിലും റെക്കോർഡ് നേട്ടം സ്വന്തമാക്കി കഴിഞ്ഞു. ഇപ്പോഴിതാ, ഈ ചിത്രത്തെ വരവേൽക്കാൻ മോഹൻലാൽ ആരാധകനായ ഒരു കലാകാരൻ കാഴ്ച വെച്ച കലാവിരുതാണ് സോഷ്യൽ മീഡിയയുടെ ശ്രദ്ധ നേടുന്നത്.

2305 റുബിക്സ് ക്യൂബുകൾ ഉപയോഗിച്ച്, ഒരു കടൽ തീരത്തു മരക്കാർ എന്ന ചിത്രത്തിന്റെ വമ്പൻ പോസ്റ്റർ ആണ് ഈ കലാകാരൻ നിർമ്മിച്ചത്. അതിമനോഹരമായി ഈ പോസ്റ്റർ ഒരുക്കിയ കലാകാരന്റെ പേര് ഹരിപ്രസാദ് സി എം എന്നാണ്. അദ്ദേഹം ഇത് ഒരുക്കുന്നതിന്റെ വീഡിയോ ഇപ്പോൾ വലിയ ശ്രദ്ധയാണ് നേടുന്നത്. ഗംഭീരമായി ഒരുക്കിയ ഈ വീഡിയോക്ക് പിന്നിലും മറ്റൊരു കടുത്ത മോഹൻലാൽ ആരാധകൻ ആണുള്ളത്. മലയാള സിനിമയിൽ, സോഷ്യൽ മീഡിയയിൽ ഏറ്റവും കൂടുതൽ ഫോളോവെർസ് ഉള്ള ആരാധകരുടെ കൂട്ടായ്മയായ മോഹൻലാൽ ഫാൻസ്‌ ക്ലബിന്റെ സാരഥികളിൽ ഒരാളായ ഉണ്ണി രാജേന്ദ്രൻ ആണ് ആണ് ഈ വീഡിയോക്ക് പിന്നിൽ പ്രവർത്തിച്ച ക്രിയേറ്റിവ് ഹെഡ്. അവനിർ ടെക്കനോളജി ഡിജിറ്റൽ പാർട്ണർ ആയി വന്ന ഈ വീഡിയോ ആശിർവാദ് സിനിമാസിന്റെ യൂട്യൂബ് ചാനലിലൂടെയാണ് പുറത്തു വന്നത്.