കേരളം കാത്തിരിക്കുന്ന വിസ്മയം; മരക്കാർ ടീസർ കാണാം..!

കംപ്ലീറ്റ് ആക്ടർ മോഹൻലാൽ നായകനായ മരക്കാർ അറബിക്കടലിന്റെ സിംഹം എന്ന ചിത്രത്തിന്റെ പുതിയ ടീസർ കഴിഞ്ഞ റിലീസ് ചെയ്തിരുന്നു. കഴിഞ്ഞ ഒരാഴ്ചക്കുള്ളിൽ പുറത്തു വരുന്ന മൂന്നാമത്തെ ടീസർ ആണിത്. ആദ്യ രണ്ടു ടീസറുകളെ പോലെ തന്നെ അതിഗംഭീരമായാണ് മൂന്നാം ടീസറും ഒരുക്കിയിരിക്കുന്നത്. ഒരു ദൃശ്യ വിസ്മയം ആണ് പ്രേക്ഷകർക്ക് മുന്നിലേക്ക് എത്താൻ ഒരുങ്ങുന്നത് എന്നാണ് ഈ ടീസറുകൾ സൂചിപ്പിക്കുന്നത്. ഇത് കൂടാതെ നേരത്തെ പുറത്തു വന്ന ട്രയ്ലർ, അഞ്ചു മനോഹരമായ ഗാനങ്ങൾ എന്നിവയും സൂപ്പർ ഹിറ്റുകളായി മാറിയിരുന്നു. കഴിഞ്ഞ രണ്ടു വർഷമായി മലയാളി പ്രേക്ഷകർ ഇത്രയധികം കാത്തിരിക്കുന്ന മറ്റൊരു ചിത്രമില്ല എന്നു തന്നെ പറയാം. ഒറ്റിറ്റി റിലീസ് വരെ തീരുമാനിച്ച ഈ ചിത്രം കേരളത്തിന്റെ ചരിത്രത്തിൽ തന്നെ ആദ്യമായി, സർക്കാർ ഇടപെട്ടാണ് തീയേറ്ററുകളിലേക്ക് തിരിച്ചു കൊണ്ടു വന്നത്.

ഇന്ത്യയിലെ ഏറ്റവും മികച്ച ചിത്രത്തിനുള്ള ദേശീയ അവാർഡ് നേടിയ ഈ ചിത്രം സംവിധാനം ചെയ്തത് പ്രിയദർശൻ ആണ്. ലോകം മുഴുവൻ 3500 ഓളം സ്ക്രീനുകളിൽ എത്താൻ പോകുന്ന ഈ ചിത്രം, ഇതിനോടകം തന്നെ അഡ്വാൻസ് ബുക്കിങ്ങിൽ കേരളത്തിലും വിദേശ മാർക്കറ്റിലും പുതിയ മോളിവുഡ് റെക്കോർഡ് സൃഷ്ടിച്ചു കഴിഞ്ഞു. വരുന്ന ഡിസംബർ രണ്ടിന് റിലീസ് ചെയ്യാൻ പോകുന്ന ഈ ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമ്മിച്ചിരിക്കുന്നത്. കേരളത്തിൽ മാത്രം എണ്ണൂറിൽ കൂടുതൽ ഫാൻസ് ഷോകളാണ് ഈ ചിത്രത്തിന് വേണ്ടി ചാർട്ട് ചെയ്തിരിക്കുന്നത്. മലയാളം കൂടാതെ തമിഴ്, തെലുങ്ക്, ഹിന്ദി, കന്നഡ ഭാഷകളിലും ഇംഗ്ലീഷിലും ഈ ചിത്രം റിലീസ് ചെയ്യും.