ലോക ഉറക്ക ദിനത്തിൽ രസകരമായ ടീസറുമായി മമ്മൂട്ടി- ലിജോ ജോസ് പെല്ലിശ്ശേരി ചിത്രം

മലയാളത്തിലെ പ്രശസ്ത സംവിധായകൻ ലിജോ ജോസ് പെല്ലിശ്ശേരി, ആദ്യമായി മലയാളത്തിന്റെ മെഗാ സ്റ്റാർ മമ്മൂട്ടിയെ നായകനാക്കി ഒരുക്കിയ ചിത്രമാണ് നൻപകൽ നേരത്തു മയക്കം. തമിഴിലും മലയാളത്തിലുമായി ഒരുക്കിയ ഈ ചിത്രം ഡിസംബറിൽ ആണ് ഷൂട്ടിംഗ് പൂർത്തിയാക്കിയത്. കഴിഞ്ഞ നവംബറിൽ പഴനിയിൽ ആയിരുന്നു ഈ ചിത്രത്തിന്റെ ഏറിയ പങ്കും ചിത്രീകരിച്ചത്. പ്രശസ്ത രചയിതാവ് എസ് ഹരീഷ് രചന നിർവഹിച്ച ഈ ചിത്രത്തിന്റെ ടീസർ ഇന്ന് റിലീസ് ചെയ്തിരിക്കുകയാണ്. സിനിമയിലെ കഥാപാത്രങ്ങൾ എല്ലാവരും കിടന്നു ഉറങ്ങുന്ന ഏതാനും ചില ദൃശ്യങ്ങൾ ആണ് ഈ ടീസറിൽ ഉൾപ്പെടുത്തിയിരിക്കുന്നത് എന്നത് കൗതുകകരമായി. പുറത്തു വരുന്ന റിപ്പോർട്ടുകൾ പ്രകാരം പകൽ സമയത്തു സൈക്കിൾ മെക്കാനിക്കും രാത്രി സമയത്തു മോഷ്ടാവുമായി ജീവിക്കുന്ന വേലൻ അഥവാ നകുലൻ എന്ന കഥാപാത്രത്തെ ആണ് മമ്മൂട്ടി ഈ ചിത്രത്തിൽ അവതരിപ്പിക്കുന്നത്.

മമ്മൂട്ടി തന്നെ തന്റെ പുതിയ നിർമ്മാണ കമ്പനിയായ മമ്മൂട്ടി കമ്പനിയുടെ ബാനറിൽ നിർമ്മിക്കുന്ന ഈ ചിത്രം ഇപ്പോൾ അതിന്റെ പോസ്റ്റ് പ്രൊഡക്ഷൻ സ്റ്റേജിലാണ്. തേനി ഈശ്വർ കാമറ ചലിപ്പിച്ച ഈ ചിത്രത്തിൽ നടി രമ്യ പാണ്ഢ്യനും നടൻ അശോകനും അഭിനയിക്കുന്നുണ്ട്. അശോകൻ ഏറെ കാലത്തിനു ശേഷം മമ്മൂട്ടിക്കൊപ്പം അഭിനയിച്ച ചിത്രം കൂടിയാണ് നൻപകൽ നേരത്തു മയക്കം. രമ്യ പാണ്ഡ്യൻ മമ്മൂട്ടിയുടെ ഭാര്യ ആയാണ് എത്തുന്നത് എന്നാണ് സൂചന. ചെറിയ കാൻവാസിൽ ഒരുക്കിയ ഈ ചിത്രം ഒടിടി റിലീസ് ആയിരിക്കും എന്ന രീതിയിലുള്ള സ്ഥിതീകരിക്കാത്ത റിപ്പോർട്ടുകൾ വരുന്നുണ്ട്. ദീപു ജോസെഫ് ആണ് ഇതിന്റെ എഡിറ്റർ. ദുൽക്കർ സൽമാന്റെ ഒഫീഷ്യൽ യൂട്യൂബ് ചാനലിൽ ആണ് ഈ ചിത്രം റിലീസ് ചെയ്തിരിക്കുന്നത്.