ഉദയകൃഷ്ണയുടെ തിരക്കഥയിൽ മെഗാസ്റ്റാറിന്റെ ത്രില്ലർ പോലീസ് വേഷം; വമ്പൻ ട്വിസ്റ്റുകളുമായി ക്രിസ്റ്റഫർ ടീസർ

മെഗാസ്റ്റാർ മമ്മൂട്ടി നായകനായി എത്തുന്ന ഏറ്റവും പുതിയ ചിത്രമായ ക്രിസ്റ്റഫറിന്റെ ആദ്യ ടീസർ ഇപ്പോൾ സോഷ്യൽ മീഡിയയിൽ ചർച്ചയായി മാറുകയാണ്. സൂപ്പർ ഹിറ്റായ റോഷാക്കിനു ശേഷം മമ്മൂട്ടി വീണ്ടുമൊരു ത്രില്ലറുമായി എത്തുന്നത് ആരാധകരിൽ ആവേശം ജനിപ്പിച്ചിട്ടുണ്ട്. ഉദയ കൃഷ്ണയുടെ തിരക്കഥയിൽ ബി ഉണ്ണികൃഷ്ണൻ സംവിധാനം ചെയ്ത ക്രിസ്റ്റഫറിൽ ടൈറ്റിൽ വേഷത്തിൽ പോലീസ് ഓഫീസറായാണ് മമ്മൂട്ടി അഭിനയിച്ചിരിക്കുന്നത്. വളരെ സ്റ്റൈലിഷ് ആയ മേക്കിങ് ആണ് ഈ ചിത്രത്തിന്റെ ഹൈലൈറ്റെന്ന സൂചനയാണ് ഇതിന്റെ ടീസർ നമ്മുക്ക് തരുന്നത്. അതുപോലെ തന്നെ പ്രേക്ഷകരിൽ ആവേശവും ആകാംഷയും ജനിപ്പിക്കുന്ന ആക്ഷൻ രംഗങ്ങളും സസ്‌പെൻസും ഈ ചിത്രത്തിന്റെ ഭാഗമാണെന്നും ഈ ടീസർ സൂചിപ്പിക്കുന്നുണ്ട്. ഇപ്പോൾ പോസ്റ്റ് പ്രൊഡക്ഷൻ ജോലികൾ നടക്കുന്ന ഈ ചിത്രത്തിന്റെ പോസ്റ്ററുകൾ, ലൊക്കേഷൻ വീഡിയോകൾ എന്നിവ നേരത്തെ തന്നെ സോഷ്യൽ മീഡിയയുടെ ശ്രദ്ധ നേടിയിരുന്നു.

ഒരു ഇൻവെസ്റ്റിഗേഷൻ ത്രില്ലറായി ഒരുക്കിയിരിക്കുന്ന ഈ ചിത്രം നിർമ്മിച്ചിരിക്കുന്നതും, ആർ ഡി ഇല്ല്യൂമിനേഷൻ എന്ന തന്റെ സ്വന്തം ബാനറിൽ സംവിധായകൻ ബി ഉണ്ണികൃഷ്ണൻ തന്നെയാണ്. യഥാർത്ഥ സംഭവത്തെ ആസ്‍പദമാക്കിയാണ് ഈ ചിത്രം ഒരുക്കിയിരിക്കുന്നതെന്ന വാർത്തകളും നേരത്തെ പുറത്തു വന്നിരുന്നു. ബയോഗ്രഫി ഓഫ് എ വിജിലാന്റി കോപ് എന്നതാണ് ഈ ചിത്രത്തിന്റെ ടൈറ്റിൽ ടാഗ് ലൈൻ. സൂപ്പർ നായികമാരായ സ്നേഹ, അമലപോൾ, ഐശ്വര്യ ലക്ഷ്മി എന്നിവരും, വിക്രം ഫെയിം വാസന്തി, ഷൈൻ ടോം ചാക്കോ, ദിലീഷ് പോത്തൻ, സിദ്ദിഖ്, ജിനു എബ്രഹാം എന്നിവരും വേഷമിട്ട ഈ ചിത്രത്തിൽ തെന്നിന്ത്യൻ താരം വിനയ് റായ് ആണ് വില്ലൻ വേഷം ചെയ്തിരിക്കുന്നത്. ജസ്റ്റിൻ വർഗീസ് സംഗീതമൊരുക്കിയ ഈ ചിത്രത്തിന് ക്യാമറ ചലിപ്പിച്ചത് ഫെയ്‌സ് സിദ്ദിഖിയും, ഇത് എഡിറ്റ് ചെയ്തിരിക്കുന്നത് മനോജുമാണ്.