ഗായകനായി അപ്പാനി ശരത്; ഒരു മില്യൺ കാഴ്ചക്കാരെയും നേടി കിർക്കൻ ടൈറ്റിൽ സോങ്; വീഡിയോ കാണാം

അങ്കമാലി ഡയറീസ് എന്ന ലിജോ ജോസ് പെല്ലിശ്ശേരി ചിത്രത്തിലൂടെ അരങ്ങേറ്റം കുറിച്ച അപ്പാനി ശരത് ഇപ്പോൾ മലയാളത്തിലെ തിരക്കുള്ള നടമാരിൽ ഒരാളാണ്. അപ്പാനി ശരത് നായകനായി എത്തുന്ന ഏറ്റവും പുതിയ ചിത്രമാണ് കിർക്കൻ. ഇപ്പോൾ ഈ ചിത്രത്തിലൂടെ പിന്നണി ഗായകനായും അരങ്ങേറ്റം കുറിച്ചിരിക്കുകയാണ് ഈ നടൻ. ഈ ചിത്രത്തിന്റെ ടൈറ്റിൽ സോങ് ആണ് ഈ നടൻ ആലപിച്ചത്. മിന്നൽ മുരളിയിലൂടെ മലയാളത്തിൽ ശ്രദ്ധ നേടിയ ഗുരു സോമസുന്ദരമാണ് കിർക്കൻ്റെ ടൈറ്റിൽ സോംഗ് റീലീസ് ചെയ്തത്. സോഷ്യൽ മീഡിയയിൽ വൈറലായി മാറിയ ഈ ഗാനം ഇപ്പോൾ ഒരു മില്യൺ കാഴ്ചക്കാരെയും യൂട്യൂബിൽ നിന്ന് നേടി സൂപ്പർ ഹിറ്റായി മുന്നോട്ടു പോവുകയാണ്. ജോബി ജോസ് സിനിമാസിനു വേണ്ടി ജോബി ജോസ് നിർമ്മിച്ച ഈ ടൈറ്റിൽ ഗാനത്തിനായി സംഗീതം ഒരുക്കിയത് മണികണ്ഠൻ അയ്യപ്പയാണ്. ശ്യാം ചിത്രീകരിച്ച ഈ ഗാനം എഡിറ്റ് ചെയ്തിരിക്കുന്നത് അമൽ വ്യാസ് ആണ്.

ഹരി സാഗർ, ആർ ജെ അജീഷ് സാരംഗി എന്നിവർ വരികൾ രചിച്ച ഈ ചിത്രം രചിച്ച് സംവിധാനം ചെയ്തിരിക്കുന്നത് ജോഷാണ്. അപ്പാനി ശരത്തിനൊപ്പം മഖ്ബൂൽ സൽമാൻ, സലിംകുമാർ, കനി കുസൃതി, വിജയരാഘവൻ, ജോണി ആന്റണി, അനാർക്കലി മരക്കാർ തുടങ്ങിയവരും പ്രധാന വേഷങ്ങളിൽ എത്തുന്ന ഈ ചിത്രത്തിന് ക്യാമറ ചലിപ്പിച്ചത് ഗൗതം ലെനിൻ, എഡിറ്റ് ചെയ്തിരിക്കുന്നത് രോഹിത് വി എസ് വാരിയത് എന്നിവരാണ്. ഒരു പോലീസ് സ്റ്റേഷനില്‍ ഒരു ദിവസം നടക്കുന്ന സംഭവങ്ങളെ ആസ്പദമാക്കിയാണ് ഈ ചിത്രം ഒരുക്കിയിരിക്കുന്നത് എന്നാണ് സൂചന. അജിത് നായരാണ് ഈ ചിത്രം നിർമ്മിച്ചിരിക്കുന്നത്.