പ്രണയഭാവങ്ങളിൽ നിറഞ്ഞ് പ്രണവ് മോഹൻലാലും കല്യാണി പ്രിയദർശൻ; ശ്രദ്ധനേടി മരക്കാറിലെ പുതിയ ഗാനം

ദേശീയ അവാർഡിന്റെ നിറവിൽ റിലീസിനൊരുങ്ങുന്ന ബ്രഹ്മാണ്ഡ ചിത്രമാണ് മരയ്ക്കാർ അറബിക്കടലിന്റെ സിംഹം. നൂതന സാങ്കേതിക വിദ്യയുടെ സഹായത്തോടെ പ്രിയദർശൻ ഒരുക്കിയ പുതിയ ചിത്രത്തിൽ മോഹൻലാൽ ചരിത്രത്തിലെ ധീര യോദ്ധാവായ കുഞ്ഞാലിമരയ്ക്കാറായി എത്തുമ്പോൾ പ്രേക്ഷകരും ആരാധകരും വലിയ കാത്തിരിപ്പിലാണ്. ഒരുപക്ഷേ ഇന്ത്യൻ സിനിമയുടെ നാഴികകല്ലായി ഈ ചിത്രം മാറുമെന്ന് നിരവധി പ്രമുഖർ ഇതിനോടകം പറഞ്ഞുകഴിഞ്ഞു.ഇന്ത്യയിലെതന്നെ പ്രശസ്തരായ നിരവധി താരങ്ങൾ ആണ് ഈ ചിത്രത്തിൽ പ്രധാന കഥാപാത്രങ്ങളായി എത്തുന്നത്. മഞ്ജുവാര്യർ, സിദ്ദിഖ്, സുനിൽ ഷെട്ടി, അർജുൻ,പ്രഭു, ബാബുരാജ്, പ്രണവ് മോഹൻലാൽ, കല്യാണി പ്രിയദർശൻ തുടങ്ങി നിരവധി ബോളിവുഡ് താരങ്ങളും ഈ ബ്രഹ്മാണ്ഡ ചിത്രത്തിന്റെ ഭാഗമാകുന്നുണ്ട്. ചിത്രത്തിലെ ഓരോ പുതിയ അപ്ഡേറ്റുകൾക്കും വലിയ പ്രാധാന്യമാണ് ലഭിച്ചുകൊണ്ടിരിക്കുന്നത്. ഇപ്പോഴിതാ ചിത്രത്തിന്റെ മനോഹരമായ പുതിയ ഗാനം സോഷ്യൽ മീഡിയയിലൂടെ പുറത്തുവന്നിരിക്കുകയാണ്. കണ്ണിൽ എന്റെ എന്ന് തുടങ്ങുന്ന ഗാനത്തിന്റെ ഒരു ടീസർ വേഷൻ ആണ് ഇപ്പോൾ പുറത്തുവിട്ടിരിക്കുന്നത്. യൂട്യൂബിൽ റിലീസ് ചെയ്ത ഗാനം മണിക്കൂറുകൾ പിന്നിടുമ്പോൾ ഇതിനോടകം ലക്ഷക്കണക്കിന് ആളുകൾ കണ്ടു കഴിഞ്ഞിരിക്കുകയാണ്.

ഇതിനോടകം സമൂഹമാധ്യമങ്ങളിൽ മറ്റുമായി ഈ ഗാനം വൈറലായി മാറിയിരിക്കുകയാണ്. മനോഹരമായഈ ഗാനം ആലപിച്ചിരിക്കുന്നത് വിനീത് ശ്രീനിവാസനും ശ്വേതാ മോഹൻ, സിയാ ഉൽ ഹഖ് എന്നിവർ ചേർന്നാണ്. ബി. കെ. ഹരി നാരായണന്റെ വരികൾക്ക് റോണി റാഫേൽ ആണ് ഈണം പകർന്നിരിക്കുന്നത്. കുഞ്ഞാലിമരയ്ക്കാറിന്റെ ചെറുപ്പകാലം അഭിനയിക്കുന്നത് നടൻ പ്രണവ് മോഹൻലാൽ ആണ്. പ്രിയദർശന്റെ മകൾ കല്യാണി പ്രിയദർശനും ഗാനത്തിൽ പ്രത്യക്ഷപ്പെടുന്നുണ്ട്. ഇരുവരുടെയും പ്രണയാദ്രമായ നൃത്തരംഗങ്ങളാണ് ചിട്ടപ്പെടുത്തിയിരിക്കുന്നത്. മനോഹരമായ നൃത്തരംഗങ്ങൾക്കൊപ്പം ചിത്രത്തിന്റെ ആർട്ട് വർക്കുകളും ഗാനത്തിന്റെ മാറ്റുകൂട്ടുന്നു. അണിയറപ്രവർത്തകരുടെ മികവുകൊണ്ട് ചിത്രം മികച്ച തിയേറ്റർ അനുഭവം നൽകുമെന്ന് ഇപ്പോൾ പുറത്തിറങ്ങിയ ഗാനം തെളിയിക്കുന്നു. മികച്ച വിഷ്വൽ എഫക്റ്റ്സ്, മികച്ച വസ്ത്രാലങ്കാരം എന്നീ വിഭാഗങ്ങളിൽ ദേശീയ പുരസ്കാരം കരസ്ഥമാക്കിയ ചിത്രം മെയ് മാസം പതിമൂന്നാം തീയതിയാണ് ലോക വ്യാപകമായി തീയേറ്ററുകളിൽ റിലീസ് ചെയ്യുന്നത്.