ജയസൂര്യക്കൊപ്പം മമ്മൂട്ടിയും; സിനിമാ പ്രേമികളെ ആവേശത്തിലാക്കി ക്യാപ്റ്റന്റെ സർപ്രൈസ് ടീസർ..!

ജയസൂര്യയുടെ കരിയറിലെ ഏറ്റവും വലിയ ചിത്രമായ ക്യാപ്റ്റൻ നാളെ റിലീസ് ചെയ്യുകയാണ്. നവാഗതനായ പ്രജീഷ് സെൻ രചന നിർവഹിച്ചു സംവിധാനം ചെയ്ത ഈ ചിത്രം മണ്മറഞ്ഞു പോയ ഫുട്ബോൾ ഇതിഹാസം വി പി സത്യന്റെ ജീവിത കഥയാണ് പറയുന്നത്. ഗുഡ് വിൽ എന്റെർറ്റൈന്മെന്റിന്റെ ബാനറിൽ ജോബി ജോർജ് നിർമ്മിച്ചിരിക്കുന്ന ഈ ചിത്രത്തിന്റെ ട്രൈലെർ, ഗാനങ്ങൾ എന്നിവ മികച്ച ജനശ്രദ്ധ നേടിയെടുത്തിരുന്നു.

ഇപ്പോഴിതാ ഇന്ന് റിലീസ് ചെയ്ത മമ്മൂട്ടി സ്പെഷ്യൽ ടീസറും സോഷ്യൽ മീഡിയയുടെ ശ്രദ്ധ നേടുകയാണ്. മെഗാ സ്റ്റാർ മമ്മൂട്ടി ഈ ചിത്രത്തിൽ അതിഥി വേഷത്തിലാണ് പ്രത്യക്ഷപ്പെടുന്നത്. അനു സിതാര നായികാ ആയെത്തുന്ന ഈ ചിത്രത്തിൽ സിദ്ദിഖ്, രഞ്ജി പണിക്കർ എന്നിവരും നിർണ്ണായക കഥാപാത്രങ്ങളെയാണ് അവതരിപ്പിക്കുന്നത്.

വി പി സത്യന്റെ ഫുട്ബോൾ ജീവിതവും വ്യക്തി ജീവിതവും ഈ ചിത്രത്തിൽ ചർച്ച ചെയ്യുന്നുണ്ട്. റോബി വർഗീസ് രാജ് ദൃശ്യങ്ങൾ ഒരുക്കിയ ഈ ചിത്രത്തിന് സംഗീതം പകർന്നിരിക്കുന്നത് ഗോപി സുന്ദർ ആണ്. ചിത്രത്തിലെ ഗാനങ്ങൾ ഇതിനോടകം സൂപ്പർ ഹിറ്റായി കഴിഞ്ഞു. ബിജിത് ബാല ആണ് ഈ ചിത്രം എഡിറ്റ് ചെയ്തിരിക്കുന്നത്.

ഈ ചിത്രത്തിന്റെ സംവിധായകനായ പ്രജീഷ് സെൻ പ്രശസ്ത സംവിധായകൻ സിദ്ദിഖിന്റെ സംവിധാന സഹായി ആയി ജോലി ചെയ്തിട്ടുള്ള അനുഭവ പരിചയമുള്ള ആളാണ്. വി പി സത്യന്റെ ജീവിതത്തോട് നൂറു ശതമാനം സത്യസന്ധത പുലർത്തുന്ന രീതിയിലാണ് ഈ ചിത്രമൊരുക്കിയിരിക്കുന്നതെന്നു അണിയറ പ്രവർത്തകർ പറയുന്നു. വമ്പൻ ബഡ്ജറ്റിലാണ് ഈ ബയോപിക് നിർമ്മിച്ചിരിക്കുന്നത്.