ജയറാമിന്റെ തിരിച്ചു വരവ് ഉറപ്പ് നൽകി മികച്ച ട്രെയ്‌ലറുമായി പഞ്ചവർണ്ണ തത്ത

രമേഷ് പിഷാരടി ആദ്യമായി സംവിധാനം ചെയ്യുന്ന ചിത്രം പഞ്ചവർണ്ണ തത്തയുടെ ട്രെയ്‌ലർ പുറത്തിറങ്ങി. ജയറാമിനെയും കുഞ്ചാക്കോ ബോബനെയും നായകന്മാരാക്കി രമേഷ് പിഷാരടി ഒരുക്കിയ ചിത്രം ഹാസ്യത്തിന് പ്രാധാന്യം നൽകി ഒരുക്കിയ കുടുംബചിത്രം ആണ്. ഇന്നലെ പുറത്തിറങ്ങിയ ട്രയ്ലറിന് വളരെ മികച്ച പ്രതികരണം ആണ് സോഷ്യൽ മീഡിയയിൽ നിന്ന് ലഭിക്കുന്നത്. ജയറാമിന്റെ വളരെ കാലത്തിന് ശേഷം ലഭിക്കുന്ന മികച്ച കഥാപാത്രവും വിജയവും ആയിരിക്കും ചിത്രത്തിലൂടെ എന്നാണ് ട്രയ്ലർ റിലീസിന് ശേഷം പ്രേക്ഷക പ്രതികരണം. പേര് പോലെ തന്നെ മനുഷ്യന്മാരെ പോലെ പക്ഷി മൃഗാദികൾക്കും ചിത്രത്തിൽ പ്രാധാന്യം ഉണ്ട്. ചിത്രം പക്ഷികളേയും മൃഗങ്ങളെയും വാടകയ്ക്ക് നൽകി ഉപജീവനം നടത്തുന്ന ഒരു മധ്യവയസ്‌കന്റെ കഥപറയുന്നു. ജനപ്രിയനും സൗമ്യനുമായ ഒരു രാഷ്ട്രീയ നേതാവ് അദ്ദേഹത്തിന്റെ ജീവിതത്തിലേക്ക് അവിചാരിതമായി ആണെങ്കിൽ കൂടിയും കടന്നു വരുന്നതോടെ സംഭവിക്കുന്ന മാറ്റങ്ങൾ ആണ് ചിത്രത്തിലൂടെ പറയുന്നത്.

അനുശ്രീ നായികയായി എത്തിയ ചിത്രത്തിൽ ധർമജൻ, മണിയൻപിള്ള രാജു തുടങ്ങിയവർ മറ്റ് കഥാപാത്രങ്ങളെ അവതരിപ്പിക്കുന്നു. രമേഷ് പിഷാരടിയുടെ എക്കാലത്തെയും ഹിറ്റ് കൂട്ടുകെട്ട് ധർമജൻ വേലു എന്ന കഥാപാത്രം ആയി എത്തുന്നു. ചിത്രം നിർമ്മിവച്ചിരിക്കുന്നത് നടനും നിർമ്മാതാവുമായ മണിയൻ പിള്ള രാജുവാണ്. ഹരി പി നായരും രമേഷ് പിഷാരടിയും രചന നിർവഹിച്ച ചിത്രത്തിന്റെ ഗാനങ്ങൾക്ക് സംഗീതം പകരുന്നത് മലയാളത്തിലെ 3 പ്രമുഖ സംഗീത സംവിധായകർ ആയ എം. ജയചന്ദ്രൻ, ഔസേപ്പച്ചൻ, നാദിർഷ എന്നിവർ ചേർന്നാണ്. പഞ്ചവർണ്ണ തത്ത എന്നു തുടങ്ങുന്ന ആദ്യ ഗാനം കഴിഞ്ഞ ദിവസം ആണ് പുറത്തിറങ്ങിയിരുന്നത്. എം ജയചന്ദ്രൻ ഈണം പകർന്ന ഗാനം വളരെയേറെ ശ്രദ്ധിക്കപ്പെട്ടിരുന്നു. ചിത്രം വിഷുവിന് തീയറ്ററുകളിൽ എത്തുന്നു.