ഹേ കണ്മണി; ശ്രദ്ധ നേടി വാശിയിലെ പുത്തൻ വീഡിയോ ഗാനം

യുവ താരം ടോവിനോ തോമസ്, കീർത്തി സുരേഷ് എന്നിവരെ കേന്ദ്ര കഥാപാത്രങ്ങളാക്കി നവാഗതനായ വിഷ്ണു ജി രാഘവ് സംവിധാനം ചെയ്ത ചിത്രമാണ് വാശി. ഈ കഴിഞ്ഞയാഴ്ച തീയേറ്ററുകളിലെത്തിയ വാശിക്ക് മികച്ച പ്രേക്ഷക- നിരൂപക പ്രശംസയാണ് ലഭിച്ചു കൊണ്ടിരിക്കുന്നത്. ഇപ്പോഴിതാ ഈ ചിത്രത്തിലെ ഒരു പുതിയ വീഡിയോ ഗാനവും സിനിമ പ്രേമികളുടെ ശ്രദ്ധ പിടിച്ചു പറ്റുകയാണ്. ഹേ കണ്മണി എന്ന വരികളോടെ തുടങ്ങുന്ന ഈ ഗാനം രചിച്ചിരിക്കുന്നത് രചിച്ചിരിക്കുന്നത് വിനായക് ശശികുമാർ, പാടിയിരിക്കുന്നത് അഭിജിത് അനിൽകുമാർ, ഗ്രീഷ്മ താരാവത് എന്നിവരാണ്. കൈലാസ് മേനോൻ ആണ് ഈ ചിത്രത്തിന് വേണ്ടി ഗാനങ്ങൾ ഒരുക്കിയിരിക്കുന്നത്. മനോഹരമായ ഈ മെലഡി ഏതായാലും മികച്ച പ്രേക്ഷക പ്രതികരണമാണ് നേടിക്കൊണ്ടിരിക്കുന്നത്. വക്കീൽ കഥാപാത്രങ്ങളായ എബിൻ, മാധവി എന്നിവരുടെ കഥയാണ് ഈ ചിത്രം പറയുന്നത്.

വക്കീലന്മാരായ ഭർത്താവും ഭാര്യയും ഒരേ കേസിന്റെ വാദി ഭാഗത്തും പ്രതി ഭാഗത്തുമെത്തുന്നതും, കോടതിയിൽ അവർ നടത്തുന്ന പോരാട്ടം അവരുടെ വ്യക്തി ജീവിതത്തേയും ബാധിക്കുന്നതുമാണ് ഈ ചിത്രത്തിന്റെ പ്രമേയം. അതിനൊപ്പം തന്നെ സാമൂഹിക പ്രസക്തിയുള്ള ചില വിഷയങ്ങളും ഈ ചിത്രത്തിലൂടെ മുന്നോട്ടു വെക്കുന്നുണ്ട്. രേവതി കലാമന്ദിറിന്റെ ബാനറിൽ ജി സുരേഷ് കുമാർ മേനക സുരേഷ് കുമാർ എന്നിവർ ചേർന്നാണ് വാശി നിർമ്മിച്ചിരിക്കുന്നത്. സംവിധായകൻ വിഷ്ണു ജി രാഘവ് തന്നെ രചന നിർവഹിച്ച ഈ ചിത്രത്തിന്റെ കഥ ജാനിസ് ചാക്കോ സൈമണിന്റേതാണ്. അനു മോഹൻ, കോട്ടയം രമേശ്, മായാ വിശ്വനാഥ്, റോണി ഡേവിഡ്, ബൈജു, നന്ദു, മായാ മേനോൻ, ശ്രീലക്ഷ്മി എന്നിവരും ഈ ചിത്രത്തിന്റെ താരനിരയിലുണ്ട്.