കയ്യടി നേടി ശുഭരാത്രിയുടെ രണ്ടാം ടീസർ; ചിത്രം ജൂലൈ ആദ്യ വാരം..!

ജനപ്രിയ നായകൻ ദിലീപ് നായകനായി എത്തുന്ന പുതിയ ചിത്രമാണ് ശുഭരാത്രി. വ്യാസൻ കെ പി രചനയും സംവിധാനവും നിർവഹിച്ച ഈ ചിത്രം ജൂലൈ ആദ്യ വാരം ആണ് റിലീസ് ചെയ്യുന്നത്. ഈ ചിത്രത്തിന്റെ ആദ്യ ടീസർ പ്രേക്ഷകർ സ്വീകരിച്ചതിനു പിന്നാലെ ഇന്നലെ റിലീസ് ചെയ്ത ഇതിന്റെ രണ്ടാം ടീസറിനും മികച്ച പ്രേക്ഷക പ്രതികരണം ആണ് ലഭിക്കുന്നത്. ഒരു റിയൽ- ലൈഫ് സംഭവത്തെ ആസ്പദമാക്കി ആണ് ഈ ചിത്രം ഒരുക്കിയിരിക്കുന്നത്. ദിലീപ് കൃഷ്ണൻ എന്ന നായക കഥാപാത്രത്തെ അവതരിപ്പിക്കുന്ന ഈ ചിത്രത്തിൽ മറ്റൊരു നിർണ്ണായക കഥാപാത്രം ആയി എത്തുന്നത് സിദ്ദിഖ് ആണ്. മുഹമ്മദ് എന്ന കഥാപാത്രത്തെ ആണ് സിദ്ദിഖ് അവതരിപ്പിക്കുന്നത്.

ഇവരെ കൂടാതെ നാദിർഷ, അനു സിതാര, വിജയ് ബാബു, ഇന്ദ്രൻസ്, സായി കുമാർ, ആശ ശരത്, ശാന്തി കൃഷ്ണ, ഷീലു അബ്രഹാം, നെടുമുടി വേണു, അജു വർഗീസ്, സുരാജ് വെഞ്ഞാറമൂട്, ഹരീഷ് പേരാടി, മണികണ്ഠൻ, സൈജു കുറുപ്പ്, കെ പി എ സി ലളിത, തെസ്നി ഖാൻ എന്നിവരും ഈ ചിത്രത്തിന്റെ താര നിരയിൽ ഉണ്ട്. ബിജിപാൽ സംഗീത സംവിധാനം നിർവഹിച്ചിരിക്കുന്ന ഈ ചിത്രത്തിന് ക്യാമറ ചലിപ്പിച്ചിരിക്കുന്നതു ആൽബി ആണ്. അബാം മൂവീസിന്റെ ബാനറിൽ അബ്രഹാം മാത്യു ആണ് ഈ ചിത്രം നിർമ്മിച്ചിരിക്കുന്നത്. വിജയ് ബാബു, മണികണ്ഠൻ എന്നിവർ അഭിനയിച്ച അയാൾ ജീവിച്ചിരിപ്പുണ്ട് എന്ന ചിത്രമാണ് വ്യാസൻ കെ പി ആദ്യമായി സംവിധാനം ചെയ്ത ചിത്രം. മികച്ച നിരൂപക പ്രശംസ നേടിയെടുത്ത ചിത്രമായിരുന്നു അത്.