ഷക്കീല ട്രൈലെർ എത്തി; ഗംഭീര സ്വീകരണം നൽകി സോഷ്യൽ മീഡിയ..!

ദക്ഷിണേന്ത്യൻ സോഫ്റ്റ് പോൺ ബി ഗ്രേഡ് ചിത്രങ്ങളിലൂടെ പ്രശസ്തയായ നടി ഷക്കീലയുടെ ജീവിത കഥയെ ആസ്പദമാക്കി ഒരുങ്ങിയ ചിത്രം പ്രദർശനത്തിന് എത്താനൊരുങ്ങുകയാണ്. ഷക്കീല എന്ന് തന്നെ പേരിട്ടിരിക്കുന്ന ഈ ചിത്രത്തിന്റെ ടീസർ കുറച്ചു ദിവസങ്ങൾക്കു മുൻപ് റിലീസ് ചെയ്യുകയും വലിയ പ്രേക്ഷക പ്രതികരണം നേടുകയും ചെയ്തിരുന്നു. ഇപ്പോഴിതാ ഈ ചിത്രത്തിന്റെ ട്രൈലെർ പുറത്തു വന്നിരിക്കുകയാണ്. ടീസറിന് ലഭിച്ചത് പോലെ മികച്ച സ്വീകരണമാണ് ഈ ട്രെയിലറിനും സോഷ്യൽ മീഡിയയിൽ നിന്ന് ലഭിച്ചിരിക്കുന്നത്. ഒരുകാലത്തു മലയാളത്തിൽ പോലും ഷക്കീല ചിത്രങ്ങൾ തരംഗമായിരുന്നു. എന്നാൽ അതിനു ശേഷം അവരുടെ ജീവിതത്തിൽ ഉണ്ടായ തിരസ്കാരങ്ങളും പ്രശ്നങ്ങളുമെല്ലാം ഏറെയാണ്. അതെല്ലാം ഈ ചിത്രത്തിലൂടെ തുറന്നു കാണിക്കപ്പെടും എന്ന് തന്നെയാണ് അണിയറ പ്രവർത്തകർ സൂചിപ്പിക്കുന്നത്. തൊണ്ണൂറുകളുടെ അവസാനത്തിലും രണ്ടായിരാമാണ്ടിന്റെ തുടക്കത്തിലും ആണ് ഷക്കീല തരംഗം തെന്നിന്ത്യൻ സിനിമയിൽ ആഞ്ഞടിച്ചത്.

കന്നഡ സംവിധായകൻ ഇന്ദ്രജിത് ലങ്കേഷ്‌ സംവിധാനം ചെയ്ത ഈ ചിത്രത്തിൽ റിച്ച ഛദ്ദ ആണ് ഷക്കീലയുടെ കഥാപാത്രമായി അഭിനയിച്ചിരിക്കുന്നത്. ഈ വർഷം ക്രിസ്‌മസ്‌ റിലീസ് ആയി എത്തിക്കാൻ ശ്രമിക്കുന്ന ഈ ചിത്രത്തിൽ റിച്ച ഛദ്ദയോടൊപ്പം പങ്കജ് ത്രിപാഠി, എസ്തർ നോരോണ, രാജീവ് പിള്ളൈ, ഷീവ റാണ എന്നിവരും പ്രധാന വേഷങ്ങൾ ചെയ്തിരിക്കുന്നു. സമി നന്വനി ആണ് ഈ ചിത്രം നിർമ്മിച്ചിരിക്കുന്നത്. വീർ സമർത്, മീറ്റ് ബ്രോസ് എന്നിവർ ചേർന്ന് സംഗീതം നൽകിയിരിക്കുന്ന ഈ ചിത്രത്തിന്റെ ക്യാമറാമാൻ സന്തോഷ് റായിയും എഡിറ്റർ ബലു സലൂജയുമാണ്. ഒരുകാലത്തു സൂപ്പർ താരങ്ങൾ കഴിഞ്ഞാൽ ഏറ്റവും കൂടുതൽ പ്രേക്ഷകരെ സിനിമാ റിലീസിന്റെ ആദ്യ ദിനങ്ങളിൽ തീയേറ്ററിൽ എത്തിക്കാൻ സാധിച്ചിരുന്ന നടിയായിരുന്നു ഷക്കീല.