ജനപ്രിയന്റെ തകർപ്പൻ നൃത്തം; കേശു ഈ വീടിന്റെ നാഥനിലെ പുതിയ വീഡിയോ സോങ് കാണാം..!

ജനപ്രിയ നായകൻ ദിലീപ് നായകനായി എത്തുന്ന പുതിയ ചിത്രമാണ് കേശു ഈ വീടിന്റെ നാഥൻ. ഈ വരുന്ന ഡിസംബർ മുപ്പത്തിയൊന്നിന് ആണ് ഈ ചിത്രം റിലീസ് ചെയ്യുന്നത്. ഡിസ്‌നി പ്ലസ് ഹോട്ട് സ്റ്റാറിൽ ആണ് കേശു ഈ വീടിന്റെ നാഥൻ റിലീസ് ചെയ്യാൻ പോകുന്നത്. പ്രശസ്ത സംവിധായകൻ നാദിർഷ സംവിധാനം ചെയ്ത ഈ ചിത്രത്തിന് തിരക്കഥ രചിച്ചിരിക്കുന്നത് തൊണ്ടിമുതലും ദൃക്‌സാക്ഷിയും പോലത്തെ പ്രേക്ഷക- നിരൂപക പ്രശംസ ഒരുപോലെ നേടിയ ചിത്രം രചിച്ച സജീവ് പാഴൂർ ആണ്. ഇതിനോടകം ഈ ചിത്രത്തിന്റെ ട്രൈലെർ, മോഷൻ പോസ്റ്റർ, ഒരു വീഡിയോ സോങ് എന്നിവ പുറത്തു വരികയും സോഷ്യൽ മീഡിയയിൽ വലിയ പ്രചാരം നേടുകയും ചെയ്തു. ഇപ്പോഴിതാ ഈ ചിത്രത്തിലെ പുതിയ ഗാനത്തിന്റെ വീഡിയോ റിലീസ് ചെയ്തിരിക്കുകയാണ്. നാരങ്ങാ മിട്ടായി എന്ന് തുടങ്ങുന്ന ഈ ഗാനം ആലപിച്ചിരിക്കുന്നത് ദിലീപ് തന്നെയാണ്.

ദിലീപിനൊപ്പം ഫ്ലവർസ് ചാനലിലെ ടോപ് സിങ്ങർ എന്ന സംഗീത മത്സരത്തിലൂടെ ശ്രദ്ധ നേടിയ വൈഷ്ണവി, വൈഗാലക്ഷ്മി, ബെവൻ, നിമാ എന്നീ കുട്ടികളും ഈ ഗാനമാലപിക്കാൻ കൂടെയുണ്ട്. ചിത്രത്തിന്റെ സംവിധായകൻ നാദിര്ഷ തന്നെയാണ് ഈ ഗാനം രചിച്ചിരിക്കുന്നതും ഇതിനു സംഗീതം പകർന്നിരിക്കുന്നതും. ദിലീപിനൊപ്പം നടി അനുശ്രീ ആണ് ഈ ഗാനരംഗത്തിൽ പ്രത്യക്ഷപ്പെട്ടിരിക്കുന്നത്. ദിലീപിന്റെ രസകരമായ നൃത്തമാണ് ഈ ഗാനത്തിന്റെ ഹൈലൈറ്റ്. ദിലീപും ഡോക്ടർ സക്കറിയ തോമസും കൂടി നിർമ്മിച്ച ഈ ചിത്രത്തിന് ക്യാമറ ചലിപ്പിച്ചത് അനിൽ നായരും എഡിറ്റ് ചെയ്തിരിക്കുന്നത് സാജനുമാണ്. ഉർവശി നായികാ വേഷം ചെയ്യുന്ന ഈ ചിത്രത്തിൽ കലാഭവൻ ഷാജോൺ, ഹരിശ്രീ അശോകൻ, കോട്ടയം നസീർ, ഹരീഷ് കണാരൻ, ജാഫർ ഇടുക്കി, സ്വാസിക എന്നിവരും അഭിനയിച്ചിട്ടുണ്ട്.