സ്റ്റീഫൻ നെടുമ്പള്ളിയെ മറികടക്കാൻ ബ്രഹ്മ; മെഗാസ്റ്റാറിന്റെ ഗോഡ്ഫാദർ ട്രൈലെർ ചർച്ച ചെയ്ത് സോഷ്യൽ മീഡിയ; ട്രൈലെർ കാണാം

ബ്ലോക്ക്ബസ്റ്റർ മോഹൻലാൽ ചിത്രമായ ലൂസിഫറിന്റെ തെലുങ്ക് റീമേക്കായ ഗോഡ്ഫാദർ ഒക്ടോബർ അഞ്ചിനാണ് പ്രേക്ഷകരുടെ മുന്നിലെത്തുന്നത്. പൃഥ്വിരാജ് സുകുമാരൻ സംവിധാനം ചെയ്ത ലൂസിഫറിലെ നായക കഥാപാത്രത്തിന്റെ പേര് സ്റ്റീഫൻ എന്നാണെങ്കിൽ, തെലുങ്കിൽ മോഹൻ രാജയൊരുക്കിയ ഗോഡ്ഫാദറിൽ ഈ കഥാപാത്രം ബ്രഹ്മയാണ്. മെഗാസ്റ്റാർ ചിരഞ്ജീവിയാണ് ബ്രഹ്മ എന്ന കഥാപാത്രമായി വെള്ളിത്തിരയിലെത്തുന്നത്. ഈ ചിത്രത്തിന്റെ ടീസർ, ഇതിലെ ഒരു ഗാനം എന്നിവ നേരത്തെ തന്നെ റിലീസ് ചെയ്യുകയും ശ്രദ്ധ നേടുകയും ചെയ്തിരുന്നു. ഇപ്പോഴിതിന്റെ ട്രെയ്‌ലറാണ് സോഷ്യൽ മീഡിയ ചർച്ച ചെയ്യുന്നത്. ഇന്നലെ റിലീസ് ചെയ്ത ഈ ട്രെയ്ലറിനെ വിമർശിക്കുന്നവരും അഭിനന്ദിക്കുന്നവരുമുണ്ട്. ഒരു തെലുങ്ക് സിനിമയുടെ സ്റ്റൈൽ ഈ ട്രൈലെർ കാത്ത് സൂക്ഷിച്ചു എന്ന് ചിലർ പറയുമ്പോൾ, ലൂസിഫർ എന്ന ചിത്രത്തിന്റെ നിലവാരത്തെ റീമേക്ക് ചെയ്ത് ഇല്ലാതാക്കി എന്നാണ് ഒരുപക്ഷം സിനിമാ പ്രേമികൾ വിലയിരുത്തുന്നത്.

മോഹൻലാലിന് പകരമാകാൻ മറ്റൊരാൾക്കും സാധിക്കില്ല എന്ന് ഈ ട്രൈലെർ കാണിച്ചു തരുന്നുണ്ടെന്നും സോഷ്യൽ മീഡിയയിൽ സിനിമാ പ്രേക്ഷകർ അടിവരയിട്ടു പറയുന്നു. ലേഡി സൂപ്പർ സ്റ്റാർ നയൻ താര, പുരി ജഗന്നാഥ്, സത്യ ദേവ്, ഹാരിഷ് ഉത്തമൻ, ജയപ്രകാശ്, സച്ചിൻ കടേക്കർ, വംശി കൃഷ്ണ, നാസർ എന്നിവരും വേഷമിട്ട ഈ ചിത്രത്തിൽ ബോളിവുഡ് മെഗാസ്റ്റാർ സൽമാൻ ഖാനും അഭിനയിക്കുന്നുണ്ട്. മലയാളത്തിൽ പൃഥ്വിരാജ് ചെയ്ത കഥാപാത്രമാണ് തെലുങ്കിൽ സൽമാൻ ഖാൻ ചെയ്യുന്നത്. കോണിഡാല പ്രൊഡക്ഷൻ കമ്പനിയും സൂപ്പർ ഗുഡ് ഫിലിംസും ചേർന്നാണ് ഗോഡ്ഫാദർ നിർമ്മിച്ചിരിക്കുന്നത്. തമൻ എസ് സംഗീതമൊരുക്കിയ ഈ ചിത്രത്തിന് കാമറ ചലിപ്പിച്ചത് നീരവ് ഷായാണ്.