“നിങ്ങളിത് കാണുക..why this man is called a genius”; പിഷാരടി ട്രിക്കിൽ തരംഗമായി ഗാനഗന്ധർവൻ ടീസർ..!

മെഗാ സ്റ്റാർ മമ്മൂട്ടിയെ നായകനാക്കി രമേഷ് പിഷാരടി സംവിധാനം ചെയ്ത ഗാനഗന്ധർവ്വൻ എന്ന ചിത്രത്തിന്റെ ആദ്യ ടീസർ ഇന്നലെ ആണ് റിലീസ് ചെയ്തത്. ഷൈജു ദാമോദരന്റെ പ്രശസ്തമായ വേൾഡ് കപ്പ് കമന്ററിയുടെ പശ്ചാത്തലത്തിൽ മമ്മൂട്ടിയുടെ ഒരു രസകരമായ സീൻ ആണ് ഈ ടീസറിൽ ഉൾപ്പെടുത്തിരിക്കുന്നതു. വളരെ വ്യത്യസ്തമായ രീതിയിൽ പ്രേക്ഷകരുടെ മുന്നിൽ എത്തിച്ചിരിക്കുന്നു ഈ ടീസർ ഇപ്പോൾ തന്നെ സോഷ്യൽ മീഡിയയിൽ തരംഗമായി കഴിഞ്ഞു. സംവിധായകനായ രമേശ് പിഷാരടിയുടെ കിടിലൻ ട്രിക്ക് ആണ് ഈ ടീസറിനെ ഇത്ര വലിയ ശ്രദ്ധാ കേന്ദ്രം ആക്കിയത് എന്നാണ് പ്രേക്ഷകർ പറയുന്നത്. വൈ ദിസ് മാൻ ഈസ് കോൾഡ് എ ജീനിയസ് എന്ന് പറയുന്ന ഷൈജു ദാമോദരന്റെ വാക്കുകൾ അതീവ രസകരമായി ആണ് ടീസറിൽ ഉൾപ്പെടുത്തിയിരിക്കുന്നത്. ഈ മാസം ഇരുപത്തിയേഴിനു ആണ് ഗാനഗന്ധർവ്വൻ തീയേറ്ററുകളിൽ എത്തുന്നത് എന്നാണ് ഇപ്പോൾ ലഭിക്കുന്ന റിപ്പോർട്ടുകൾ പറയുന്നത്.

ഗാനമേള പാട്ടുകാരനായ കലാസദൻ ഉല്ലാസായി മമ്മൂട്ടി വേഷമിടുന്ന ഗാനഗന്ധർവ്വനിൽ പുതുമുഖം വന്ദിതയാണ് നായികാ വേഷത്തിൽ എത്തുന്നത്. മുകേഷ്, ഇന്നസെന്റ്, സിദ്ധിഖ്, സലിം കുമാർ, ധർമജൻ ബോൾഗാട്ടി, ഹരീഷ് കണാരൻ, മനോജ്. കെ. ജയൻ, സുരേഷ് കൃഷ്ണ, മണിയൻ പിള്ള രാജു, കുഞ്ചൻ, അശോകൻ, സുനിൽ സുഖദ, അതുല്യ, ശാന്തി പ്രിയ തുടങ്ങിയവരും ഈ ചിത്രത്തിൽ പ്രധാന വേഷങ്ങളിൽ എത്തുന്നു. രമേഷ് പിഷാരടിയും ഹരി .പി നായരും ചേർന്ന് കഥയും തിരക്കഥയും സംഭാഷണവും ഒരുക്കിയിരിക്കുന്ന ഈ ചിത്രം നിർമ്മിച്ചിരിക്കുന്നത് ഇച്ചായീസ് പ്രൊഡക്ഷൻസും രമേഷ് പിഷാരടി എന്റർടൈൻമെൻറ്സും ചേർന്നാണ്. പ്രശസ്ത ക്യാമറാമാൻ അഴകപ്പൻ ഛായാഗ്രഹണവും ലിജോ പോൾ എഡിറ്റിoഗും നിർവഹിക്കുന്ന ഗാനഗന്ധർവ്വന് ഗാനങ്ങൾ ഒരുക്കുന്നത് ദീപക് ദേവാണ്.