സദാചാര പോലീസിനി വേണ്ട ഇവിടെ, ഇത് പുതിയ ലോകം പുതിയ നിയമം; വൈറലാവാൻ അടുത്ത ഒമർ ലുലു ഗാനം

സൂപ്പർ ഹിറ്റ് മലയാള സംവിധായകൻ ഒമർ ലുലു ഒറ്റിറ്റിക്ക് വേണ്ടി ഒരുക്കിയ ചിത്രമാണ് നല്ല സമയം. ഫണ്‍ ത്രില്ലര്‍ എന്ന് വിശേഷിപ്പിച്ചിരിക്കുന്ന ഈ ചിത്രത്തില്‍ നായകനായി എത്തിയിരിക്കുന്നത് പ്രശസ്ത നടൻ ഇര്‍ഷാദ് അലി ആണ്. നാല് പുതുമുഖ നായികമാരെയാണ് ഈ ചിത്രത്തിലൂടെ ഒമർ ലുലു അവതരിപ്പിക്കുന്നത്. ഇവരെ പരിചയപ്പെടുത്തിക്കൊണ്ട് അദ്ദേഹം കഴിഞ്ഞ ദിവസം പുറത്ത് വിട്ട വീഡിയോ ഗാനമാണ് ഇപ്പോൾ ശ്രദ്ധ നേടുന്നത്. ഫ്രീക്ക് ലുക്കില്‍ ഫ്രണ്ട്‍സുമായി എന്ന് ആരംഭിക്കുന്ന ഗാനത്തിന് വരികള്‍ എഴുതിയിരിക്കുന്നത് രാജീവ് ആലുങ്കല്‍, പാടിയിരിക്കുന്നത് ബിന്ദു അനിരുദ്ധന്‍, ജീനു നസീര്‍, ചിത്ര എസ് എന്നിവരാണ്. ചിത്ര എസ് ആണ് ഈ ഗാനത്തിന് ഈണം പകർന്നിരിക്കുന്നത്. പുതുമുഖ നായികമാരായ നീന മധു, നോറ ജോണ്‍, നന്ദന സഹദേവന്‍, ഗായത്രി ശങ്കര്‍ എന്നിവരാണ് ഈ ചിത്രത്തിലെ പ്രധാന സ്ത്രീ കഥാപാത്രങ്ങൾക്ക് ജീവൻ പകരുന്നത്. വളരെ സ്റ്റൈലിഷ് ആയാണ് അവരെ ഈ ഗാനത്തിൽ അവതരിപ്പിച്ചിരിക്കുന്നത്. ഇന്ദുലേഖ വാര്യരാണ് ഈ ഗാനത്തിന് വേണ്ടി റാപ് വരികൾ എഴുതി ആലപിച്ചത്.

ഒറ്റ രാത്രിയിൽ നടക്കുന്ന സംഭവങ്ങള്‍ ആണ് ഈ ചിത്രത്തിലൂടെ പറഞ്ഞിരിക്കുന്നതെന്നാണ് സൂചന. സിനു സിദ്ധാർഥ് ക്യാമറ ചലിപ്പിച്ച ഈ ചിത്രം ഒമർ ലുലു സംവിധാനം ചെയ്ത അഞ്ചാമത്തെ ചിത്രമാണ്. കെജിസി സിനിമാസിന്റെ ബാനറിൽ നവാഗതനായ കലന്തൂർ ആണ് ഈ ചിത്രം നിർമ്മിച്ചിരിക്കുന്നത്. ചിത്ര എസ്, ഒമർ ലുലു എന്നിവർ ചേർന്ന് രചിച്ച ഈ ചിത്രം എഡിറ്റ് ചെയ്തിരിക്കുന്നത് രതിൻ രാധാകൃഷ്ണൻ ആണ്. ആക്ഷൻ ഹീറോ ബാബു ആന്റണി നായകനായി തിരിച്ചു വരുന്ന പവർ സ്റ്റാർ എന്ന മാസ്സ് ചിത്രമാണ് ഒമർ ലുലുവിന്റെ അടുത്ത തീയേറ്റർ റിലീസ്. പവർ സ്റ്റാർ ക്രിസ്മസ് റിലീസായാണ് എത്തുകയെന്നാണ് സൂചന.