സീതാ രാമം കണ്ടു നിറകണ്ണുകളോടെ ദുൽഖർ സൽമാൻ; വീഡിയോ കാണാം

മലയാളത്തിന്റെ യുവ താരം ദുൽഖർ സൽമാൻ നായകനായ ഏറ്റവും പുതിയ തെലുങ്ക് ചിത്രമാണ് സീതാരാമം. ഇന്നാണ് ഈ ചിത്രം ആഗോള റിലീസായി പ്രേക്ഷകരുടെ മുന്നിലെത്തിയത്. മൃണാൾ താക്കൂർ നായികാ വേഷം ചെയ്ത ഈ ചിത്രത്തിൽ രശ്‌മിക മന്ദാനയും പ്രധാന വേഷം ചെയ്യുന്നുണ്ട്. ഒരു പീരീഡ് റൊമാന്റിക്ക് ഡ്രാമയായി അണിയിച്ചൊരുക്കിയിരിക്കുന്ന ഈ ചിത്രത്തിന് മികച്ച പ്രേക്ഷക പ്രതികരണമാണ് ലഭിക്കുന്നതെന്ന്‌ റിപ്പോർട്ടുകൾ സൂചിപ്പിക്കുന്നു. ഏതായാലും ഈ ചിത്രത്തിന്റെ ആദ്യ ഷോ കണ്ട് പുറത്തിറങ്ങിയ അണിയറ പ്രവര്‍ത്തകരുടെ വീഡിയോയാണ് ഇപ്പോള്‍ സോഷ്യല്‍ മീഡിയയില്‍ വൈറലാകുന്നത്. നിറകണ്ണുകളോടെയാണ് ദുൽഖർ സൽമാൻ ഉൾപ്പെടെയുള്ള അണിയറ പ്രവർത്തകർ പുറത്തേക്കു വരുന്നത്. ദുല്‍ഖറും, നായികയായ മൃണാള്‍ താക്കൂറും ഈ ചിത്രത്തിന്റെ സംവിധായകനായ ഹനു രാഘവപ്പുടിയെ ആലിംഗനം ചെയ്യുന്നതും അവരുടെ സന്തോഷം പിന്നീട് ആനന്ദക്കണ്ണീരായി മാറുന്നതും വീഡിയോയിൽ നമ്മുക്ക് കാണാൻ സാധിക്കുന്നുണ്ട്.

ദുല്‍ഖര്‍ സല്‍മാന്‍-മൃണാള്‍ താക്കൂര്‍ കെമിസ്ട്രി മികച്ചു നിന്നു എന്നും ഷോ സ്റ്റീലർ ആയി മാറിയത് മൃണാൾ ആണെന്നും പ്രേക്ഷകർ പറയുന്നുണ്ട്. രശ്മിക മന്ദാനയുടെ അഫ്രീന്‍ എന്ന കഥാപാത്രവും അഭിനന്ദനം നേടുന്നു. 1965ലെ ഇന്‍ഡോ- പാക് യുദ്ധത്തിന്റെ പശ്ചാത്തലത്തില്‍ നടക്കുന്ന ഇതിന്റെ കഥ ഒരു പ്രണയകഥ പോലെയും അതുപോലെ ഒരു ഹിസ്റ്റോറിക്കൽ ഫിക്ഷൻ പോലെയുമാണ് ഒരുക്കിയിരിക്കുന്നത്. ഹനു രാഘവപ്പുടിക്കൊപ്പം ജയ് കൃഷ്ണയും- രാജ്കുമാര്‍ കണ്ടമുഡിയും ചേർന്ന് സംഭാഷണം ഒരുക്കിയ ഈ ചിത്രം നിർമ്മിച്ചിരിക്കുന്നത് സ്വപ്ന സിനിമയും വൈജയന്തി മൂവീസും ചേർന്നാണ്. കോതഗിരി വെങ്കടേശ്വര റാവു എഡിറ്റ് ചെയ്ത ഈ ചിത്രത്തിന് ക്യാമറ ചലിപ്പിച്ചത് പി എസ് വിനോദ്, ശ്രേയസ് കൃഷ്ണ എന്നിവരും സംഗീതമൊരുക്കിയത് വിശാൽ ചന്ദ്രശേഖറുമാണ്.