യഥാർത്ഥ നായകന്മാർ എപ്പോഴും തനിച്ചാണ്; മോഹൻലാൽ- ഷാജി കൈലാസ് ചിത്രത്തിന്റെ ഡയലോഗ് ടീസർ കാണാം..!

കംപ്ലീറ്റ് ആക്ടർ മോഹൻലാൽ നായകനായി എത്തുന്ന പുതിയ ചിത്രമാണ് എലോൺ. ഒരു വലിയ ഇടവേളയ്ക്കു ശേഷം മോഹൻലാൽ- ഷാജി കൈലാസ് ടീം ഒന്നിച്ച ഈ ചിത്രത്തിന്റെ ഷൂട്ടിംഗ് ഇപ്പോൾ എറണാകുളത്തും പരിസര പ്രദേശങ്ങളിലും ആയി പുരോഗമിക്കുകയാണ്. രാജേഷ് ജയരാമൻ തിരക്കഥ രചിച്ച ഈ ചിത്രം നിർമ്മിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ്. ഒരു ഇൻവെസ്റ്റിഗേഷൻ ത്രില്ലർ ആണ് ഈ ചിത്രം എന്ന് സ്ഥിതീകരിക്കാത്ത റിപ്പോർട്ടുകൾ വരുന്നുണ്ട്. ഏതായാലും ഇപ്പോൾ ഈ ചിത്രത്തിന്റെ ഒരു ഡയലോഗ് ടീസർ പുറത്തു വന്നിട്ടുണ്ട്. മികച്ച പ്രതികരണമാണ് ഈ ടീസർ നേടിയെടുക്കുന്നത്. യഥാർത്ഥ നായകന്മാർ എപ്പോഴും തനിച്ചാണ് എന്ന ഡയലോഗ് ആണ് ഈ ടീസറിലുള്ളത്. അതോടൊപ്പം കണ്ണാടിയിൽ നോക്കി നിൽക്കുന്ന മോഹൻലാലിനെയും ടീസറിൽ നമ്മുക്ക് കാണാം. കിടിലൻ ലുക്കിലാണ് മോഹൻലാൽ ഈ ചിത്രത്തിൽ പ്രത്യക്ഷപ്പെടുന്നത്. ജേക്സ് ബിജോയ് ഒരുക്കിയ പശ്ചാത്തല സംഗീതമാണ് ഇപ്പോൾ വന്ന ടീസറിന്റെ ഹൈലൈറ്റ് എന്ന് പറയാം.

ഇതിനു മുൻപ് പുറത്തു വന്ന ടൈറ്റിൽ ലോഞ്ച് വീഡിയോ, ടൈറ്റിൽ മേക്കിങ് വീഡിയോ ഒക്കെ മികച്ച പ്രേക്ഷക ശ്രദ്ധ നേടിയിരുന്നു. ഏതായാലും ഈ ഡയലോഗ് ടീസർ കൂടി വന്നതോടെ പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ഒരു ചിത്രമായി എലോൺ മാറി കഴിഞ്ഞു. മോഹൻലാൽ ഒഴികെ ബാക്കി ആരൊക്കെ ഈ ചിത്രത്തിൽ അഭിനയിക്കുന്നുണ്ട് എന്ന വിവരം അണിയറ പ്രവർത്തകർ പുറത്തു വിട്ടിട്ടില്ല. അഭിനന്ദം രാമാനുജൻ ക്യാമറ ചലിപ്പിക്കുന്ന ഈ ചിത്രം എഡിറ്റ് ചെയ്യുന്നത് ഡോൺ മാക്സ് ആണ്. ആശീർവാദ് സിനിമാസിന്റെ മുപ്പതാമത്‌ നിർമ്മാണ സംരംഭമാണ് എലോൺ.