ബുള്ളറ്റിനെ പ്രണയിച്ച് ധ്യാൻ ശ്രീനിവാസൻ; ശ്രദ്ധ നേടി ബുള്ളറ്റ് ഡയറീസ് ആദ്യ ടീസർ

നടനും സംവിധായകനും രചയിതാവുമായ ധ്യാൻ ശ്രീനിവാസൻ നായകനായി എത്തുന്ന ഏറ്റവും പുതിയ ചിത്രങ്ങളിൽ ഒന്നാണ് ബുള്ളറ്റ് ഡയറീസ്. സന്തോഷ് മണ്ടൂര്‍ രചനയും സംവിധാനവും നിര്‍വ്വഹിച്ചിരിക്കുന്ന ചിത്രത്തില്‍ ധ്യാൻ ശ്രീനിവാസനൊപ്പം കഥയുടെ പ്രധാന ഭാഗമായി വരുന്നത് ഒരു 64 മോഡല്‍ ബുള്ളറ്റ് മോട്ടോര്‍ സൈക്കിളാണ്. പ്രയാഗ മാര്‍ട്ടിന്‍ നായികയാവുന്ന ചിത്രത്തില്‍ രണ്‍ജി പണിക്കരാണ് മറ്റൊരു പ്രധാന കഥാപാത്രത്തിന് ജീവൻ പകരുന്നത്. ഇപ്പോഴിതാ ഈ ചിത്രത്തിന്റെ ആദ്യ ടീസർ പ്രേക്ഷകരുടെ മുന്നിലെത്തിയിരിക്കുകയാണ്. നർമ്മ മുഹൂർത്തങ്ങൾക്കും പ്രണയത്തിനും അതുപോലെ വൈകാരിക നിമിഷങ്ങൾക്കും ഒരുപോലെ പ്രാധാന്യമുള്ള ഒരു ഫാമിലി ഡ്രാമയാണ് ഈ ചിത്രമെന്ന സൂചനയാണ് ഇതിന്റെ ടീസർ നൽകുന്നത്. അത്പോലെ തന്നെ ആകാംഷ നിറക്കുന്ന കഥാസന്ദർഭങ്ങളും ഇതിലുണ്ടെന്ന ഫീലും ഈ ടീസർ നമ്മുക്ക് നൽകുന്നുണ്ട്.

ആൻസൺ പോൾ, ജോണി ആന്‍റണി, ശ്രീകാന്ത് മുരളി, സലിം കുമാർ, അൽത്താഫ് സലീം, ശ്രീലക്ഷ്മി, സുധീര്‍ കരമന, ഷാലു റഹിം, കോട്ടയം പ്രദീപ്, സന്തോഷ് കീഴാറ്റൂര്‍, കെ വി വി മനോജ് എന്നിവരും മറ്റ് പ്രധാന വേഷങ്ങൾ അവതരിപ്പിക്കുന്ന ഈ ചിത്രം ബി 3 എം ക്രിയേഷൻസ് ആണ് അവതരിപ്പിക്കുന്നത്. ഫൈസൽ അലി ക്യാമറ ചലിപ്പിച്ചിരിക്കുന്ന ഈ ചിത്രത്തിന് സംഗീതം പകർന്നിരിക്കുന്നത് ഷാൻ റഹ്മാൻ ആണ്. കൈതപ്രം, അനു എലിസബത്ത് ജോസ് എന്നിവർ വരികൾ രചിച്ച ഇതിലെ ഗാനങ്ങൾ ആലപിച്ചിരിക്കുന്നത് ലിബിന്‍ സ്കറിയ, സൂരജ് സന്തോഷ്, മേഘ ജോസ്‍കുട്ടി, ഷാന്‍ റഹ്മാന്‍ എന്നിവരാണ്. രഞ്ജൻ എബ്രഹാമാണ് ബുള്ളറ്റ് ഡയറീസിന്റെ എഡിറ്റർ. ധ്യാൻ ശ്രീനിവാസൻ നായകനായ വീക്കം എന്ന പുതിയ ചിത്രം കഴിഞ്ഞ ദിവസമാണ് റിലീസ് ആയത്.