എ ആർ റഹ്മാൻ സംഗീതത്തിൽ മനോഹരമായ ദൃശ്യങ്ങളുമായി മലയൻകുഞ്ഞിലെ ചോലപ്പെണ്ണേ; വീഡിയോ സോങ് കാണാം

ഫഹദ് ഫാസിലിനെ നായകനാക്കി നവാഗതനായ സജിമോൻ സംവിധാനം ചെയ്ത മലയൻ കുഞ്ഞെന്ന ചിത്രം ഇപ്പോൾ മികച്ച പ്രേക്ഷക പിന്തുണയുമായി മുന്നേറുകയാണ്. നിരൂപകരും പ്രശംസ ചൊരിയുന്ന ഈ ചിത്രത്തിന് അഭിനന്ദനവുമായി അന്യ ഭാഷാ സിനിമാ പ്രവർത്തകരും മുന്നോട്ടു വന്നിരുന്നു. ടേക്ക് ഓഫ്, മാലിക്, സീ യു സൂൺ എന്നീ സൂപ്പർ ഹിറ്റ് ചിത്രങ്ങൾ നമ്മുക്ക് സമ്മാനിച്ച മഹേഷ് നാരായണൻ തിരക്കഥ രചിച്ച ചിത്രമാണിത്. അദ്ദേഹം തന്നെ ഛായാഗ്രഹണവും നിർവഹിച്ച ഈ ചിത്രം നിർമ്മിച്ചിരിക്കുന്നത് ഫാസിലാണ്. ഉരുള്‍പൊട്ടലും മണ്ണിടിച്ചിലും സംഭവിച്ച് ഭൂമിക്കടിയിൽ കുടുങ്ങി പോകുന്ന അനികുട്ടൻ എന്ന കഥാപാത്രത്തിന്റെ അതിജീവനം നമ്മുക്ക് കാണിച്ചു തരുന്ന സർവൈവൽ ത്രില്ലറാണ് മലയൻ കുഞ്ഞ്. ഇപ്പോഴിതാ ഇതിലെ ഒരു വീഡിയോ സോങ് റിലീസ് ചെയ്തിരിക്കുകയാണ്.

സംഗീത മാന്ത്രികൻ എ ആർ റഹ്മാൻ ഈണം നൽകിയ ചോലപ്പെണ്ണേ എന്ന് തുടങ്ങുന്ന ഗാനമാണ് ഇപ്പോൾ റിലീസ് ചെയ്തിരിക്കുന്നത്. 30 വര്‍ഷത്തിന് ശേഷം ഒരു മലയാളം സിനിമക്കായി റഹ്മാന്‍ ഒരുക്കിയ ഗാനങ്ങളാണ് ഈ ചിത്രത്തിലുള്ളത്. വിനായക് ശശികുമാർ വരികൾ രചിച്ച ഈ ഗാനത്തിൽ നമ്മുക്ക് കാണാൻ സാധിക്കുന്നത് രെജിഷാ വിജയൻ അവതരിപ്പിക്കുന്ന കഥാപാത്രത്തിന്റെ വിവാഹ തലേന്നുള്ള ദൃശ്യങ്ങളാണ്. ഫഹദ് ഫാസിൽ കഥാപാത്രത്തിന്റെ സഹോദരിയായാണ്‌ ഈ ചിത്രത്തിൽ രെജിഷ അഭിനയിച്ചിരിക്കുന്നത്. വിജയ് യേശുദാസ് ആലപിച്ച ഈ ഗാനത്തിലെ ദൃശ്യങ്ങൾ അതിമനോഹരമായാണ് ഒരുക്കിയിരിക്കുന്നത്. ഇന്ദ്രന്‍സ്, ജാഫര്‍ ഇടുക്കി, ജയ കുറുപ്പ്, ദീപക് പറമ്പോല്‍, അര്‍ജുന്‍ അശോകന്‍, ജോണി ആന്റണി, ഇര്‍ഷാദ് തുടങ്ങിയവരും അഭിനയിച്ചിരിക്കുന്ന ഈ ചിത്രം ഫഹദിന്റെ കരിയറിലെ തന്നെ ഏറ്റവും മുതൽ മുടക്കുള്ള മലയാള ചിത്രമാണ്.