30 വർഷത്തിന് ശേഷം എ ആർ റഹ്മാൻ മലയാളത്തിൽ; മലയൻ കുഞ്ഞിലെ ആദ്യ ഗാനം കാണാം

മലയാളത്തിന്റെ യുവ താരം ഫഹദ് ഫാസിൽ നായകനായി എത്തുന്ന ഏറ്റവും പുതിയ ചിത്രമാണ് മലയൻ കുഞ്ഞ്. ഫഹദിന്റെ പിതാവും സംവിധായകനുമായ ഫാസിൽ നിർമ്മിച്ച ഈ ചിത്രം സംവിധാനം ചെയ്തിരിക്കുന്നത് നവാഗതനായ സജിമോനാണ്. ഇതിന്റെ ട്രൈലെർ നേരത്തെ റിലീസ് ചെയ്യുകയും വലിയ ശ്രദ്ധ നേടുകയും ചെയ്തിരുന്നു. ഒരു സർവൈവൽ ത്രില്ലറായാണ് ഈ ചിത്രമൊരുക്കിയിരിക്കുന്നതെന്ന സൂചനയാണ് ഇതിന്റെ ട്രൈലെർ നമ്മുക്ക് തരുന്നത്. ഇപ്പോഴിതാ ഈ ചിത്രത്തിലെ ആദ്യ ഗാനവും റിലീസ് ചെയ്തിരിക്കുകയാണ്. മുപ്പതു വർഷങ്ങൾക്കു ശേഷം സംഗീത മാന്ത്രികൻ എ ആർ റഹ്മാൻ മലയാളത്തിൽ സംഗീത സംവിധാനം നിർവഹിച്ച ചിത്രം കൂടിയാണ് മലയൻ കുഞ്ഞ്. ഇപ്പോൾ പുറത്തു വന്നിരിക്കുന്ന ചോലപ്പെണ്ണേ എന്ന് തുടങ്ങുന്ന ഗാനം രചിച്ചിരിക്കുന്നത് വിനായക് ശശികുമാറാണ്. എ ആർ റഹ്‌മാന്റെ ഈണത്തിൽ വിജയ് യേശുദാസ് ആണ് ഈ ഗാനമാലപിച്ചിരിക്കുന്നത്.

1992ല്‍ പുറത്തിറങ്ങിയ യോദ്ധ എന്ന സൂപ്പർ ഹിറ്റ് മോഹൻലാൽ- സംഗീത് ശിവൻ ചിത്രത്തിലാണ് എ ആർ റഹ്മാൻ ഇതിനു മുൻപ് മലയാളത്തിൽ സംഗീത സംവിധാനം നിർവഹിച്ചത്. മലയൻ കുഞ്ഞ് കൂടാതെ, ഇനി വരാനുള്ള പൃഥ്വിരാജ്- ബ്ലെസി ചിത്രമായ ആട് ജീവിതത്തിന് സംഗീത സംവിധാനം നിർവഹിക്കുന്നതും എ ആർ റഹ്മാൻ ആണ്. ടേക്ക് ഓഫ്, സി യു സൂണ്‍, മാലിക് എന്നീ ചിത്രങ്ങളുടെ സംവിധായകന്‍ മഹേഷ് നാരായണന്‍ തിരക്കഥ രചിച്ച മലയൻ കുഞ്ഞ് ജൂലൈ 22 നാണു റിലീസ് ചെയ്യാൻ പോകുന്നത്. മഹേഷ് നാരായണൻ ക്യാമറയും ചലിപ്പിച്ച ഈ ചിത്രം എഡിറ്റ് ചെയ്യുന്നത് അർജു ബെൻ ആണ്. രജിഷ വിജയൻ, ഇന്ദ്രൻസ്, ജാഫർ ഇടുക്കി, ദീപക് പറമ്പോൾ എന്നിവരും ഈ ചിത്രത്തിന്റെ താരനിരയിലുണ്ട്.