എനിക്കില്ലാ വർണങ്ങൾ നീ തരുമോ..?; വിചിത്രത്തിലെ മനോഹര ഗാനം കാണാം

മലയാള സിനിമ പ്രേമികൾ ഇതുവരെ കാണാത്ത തരത്തിലുള്ള ഒരു ചലച്ചിത്രാനുഭവം അവർക്ക് സമ്മാനിച്ച ചിത്രമാണ് ഷൈൻ ടോം ചാക്കോ നായകനായി എത്തിയ വിചിത്രം. ഹൊറർ ചിത്രത്തിന്റെ ഫീലും ത്രില്ലർ ചിത്രത്തിന്റെ ഫീലും പ്രേക്ഷകന് നൽകിയ വിചിത്രം ഒരു ഫാമിലി ഡ്രാമ കൂടിയായിരുന്നു. ജാസ്മിൻ എന്ന അമ്മയുടേയും, ആ അമ്മയുടെ 5 മക്കളുടേയും, അവരുടെ കുടുംബം നേരിടുന്ന പ്രതിസന്ധികളുടേയും കഥയാണ് ഈ ചിത്രം പറഞ്ഞത്. ഇപ്പോഴിതാ ഇതിലെ ഒരു മനോഹര ഗാനത്തിന്റെ വീഡിയോ റിലീസ് ചെയ്തിരിക്കുകയാണ്. ചിത്രശലഭമായ് എന്ന വരികളോടെ തുടങ്ങുന്ന ഈ ഗാനം ഇപ്പോൾ മികച്ച പ്രേക്ഷക ശ്രദ്ധയാണ് നേടുന്നത്. മനോജ് പരമേശ്വരൻ വരികൾ രചിച്ച് ജോഫി ചിറയത്ത് ഈണമിട്ടിരിക്കുന്ന ഈ ഗാനം ആലപിച്ചിരിക്കുന്നത് മരിയ ജോണിയാണ്. ഷൈൻ ടോം ചാക്കോ, ബാലു വർഗീസ് എന്നിവർ ഗംഭീര പ്രകടനം കാഴ്ച വെച്ച ഈ ചിത്രത്തിൽ കനി കുസൃതി, ലാല്‍, ജോളി ചിറയത്ത്, കേതകി നാരായണ്‍ തുടങ്ങിയവരും അഭിനയിച്ചിട്ടുണ്ട്.

കനി കുസൃതി, കേതകി നാരായണൻ എന്നിവരാണ് ഈ ഗാനരംഗത്തിൽ അഭിനയിച്ചിരിക്കുന്നത്. നിഖില്‍ രവീന്ദ്രൻ രചിച്ച വിചിത്രം സംവിധാനം ചെയ്തിരിക്കുന്നത് അച്ചു വിജയനാണ്. സംവിധായകൻ തന്നെ എഡിറ്റിംഗും നിർവഹിച്ച ഈ ചിത്രം ജോയ് മൂവി പ്രൊഡക്ഷന്‍സിന്റെ ബാനറില്‍ ഡോക്ടര്‍ അജിത് ജോയും അച്ചു വിജയനും ചേർന്നാണ് നിർമ്മിച്ചിരിക്കുന്നത്. അർജുൻ ബാലകൃഷ്ണൻ ദൃശ്യങ്ങളൊരുക്കിയ ഈ ചിത്രത്തിന് സംഗീതമൊരുക്കിയത് ജുബൈർ മുഹമ്മദാണ്. സൂരജ് രാജ് കോ ഡയറക്ടറായും ആര്‍ അരവിന്ദന്‍ ക്രിയേറ്റീവ് ഡയറക്ടറായും പ്രവർത്തിച്ച ഈ ചിത്രം പ്രേക്ഷകരും നിരൂപകരും ഒരുപോലെ സ്വീകരിച്ച ചിത്രം കൂടിയാണ്.