ചിരിപ്പൂരവുമായി നിവിൻ പോളിയുടെ സാറ്റർഡേ നൈറ്റ്; ആദ്യ പകുതിക്ക് ഗംഭീര പ്രതികരണം

യുവ താരം നിവിൻ പോളിയെ നായകനാക്കി സൂപ്പർ ഹിറ്റ് സംവിധായകൻ റോഷൻ ആൻഡ്രൂസ് ഒരുക്കിയ ഏറ്റവും പുതിയ ചിത്രമായ സാറ്റർഡേ നൈറ്റ് ഇന്ന് റിലീസ് ചെയ്തു. നിവിൻ പോളിക്കൊപ്പം അജു വർഗീസ്, സിജു വിൽസൺ, സൈജു കുറുപ്പ്, ഗ്രേസ് ആന്റണി, മാളവിക ശ്രീനാഥ്, സാനിയ ഇയ്യപ്പൻ എന്നിവരും വേഷമിട്ട ഈ ചിത്രം വിനായക ഫിലിംസിന്റെ ബാനറിൽ അജിത് വിനായകയാണ് നിർമ്മിച്ചിരിക്കുന്നത്. എ ബി സി ഡി, അനുരാഗ കരിക്കിൻ വെള്ളം എന്നീ ഹിറ്റ് ചിത്രങ്ങൾ രചിച്ച നവീൻ ഭാസ്കർ തിരക്കഥ രചിച്ച ഈ ബിഗ് ബഡ്ജറ്റ് ചിത്രത്തിന് വലിയ സ്വീകരണമാണ് ഇപ്പോൾ ലഭിക്കുന്നത്. നിവിൻ പോളി ആരാധകർ ഏറെ ആവേശത്തോടെ സ്വീകരിക്കുന്ന ഈ ചിത്രത്തിന്റെ ആദ്യ പകുതി പൂർത്തിയാവുമ്പോൾ ഇതിനു ലഭിക്കുന്നത് ഗംഭീര പ്രേക്ഷക പ്രതികരണമാണ്. പ്രേക്ഷകർക്ക് പൊട്ടിച്ചിരിയുടെ ഒട്ടേറെ മുഹൂർത്തങ്ങളാണ് ഈ ചിത്രം സമ്മാനിക്കുന്നത്. നിവിൻ പോളി അവതരിപ്പിക്കുന്ന സ്റ്റാൻലി എന്ന കഥാപാത്രം സ്‌ക്രീനിലെത്തുന്നതോടെ വലിയ ആവേശമാണ് പ്രേക്ഷകർക്കും ലഭിക്കുന്നത്.

ഓരോ അഭിനേതാക്കളും കയ്യടി നേടുന്ന ആദ്യ പകുതി അവസാനിക്കുമ്പോൾ അതിലും മുകളിൽ നിൽക്കുന്ന രണ്ടാം പകുതിയാണ് പ്രേക്ഷകർ പ്രതീക്ഷിക്കുന്നത്. ആകാംഷ സമ്മാനിക്കുന്ന നിമിഷങ്ങളും പ്രേക്ഷകർക്ക് സമ്മാനിക്കുന്ന സാറ്റർഡേ നൈറ്റ് ആദ്യ പകുതി ഏതായാലും പ്രേക്ഷകർ പ്രതീക്ഷിച്ചതിലും അപ്പുറമാണെന്ന തരത്തിലുള്ള അഭിപ്രായങ്ങളാണ് സോഷ്യൽ മീഡിയയിൽ നിന്നും ലഭിക്കുന്നത്. ടി ശിവാനന്ദേശ്വരൻ എഡിറ്റ് ചെയ്ത ഈ ചിത്രത്തിന് ക്യാമറ ചലിപ്പിച്ചത് അസ്‌ലം കെ പുരയിലാണ്. ജേക്സ് ബിജോയ് ഒരുക്കിയ സംഗീതവും പ്രേക്ഷകരെ ഏറെ രസിപ്പിക്കുന്നുണ്ട്.