വീണ്ടും മാസിന്റെ ആറാട്ടുമായി മെഗാസ്റ്റാർ ചിരഞ്ജീവി; ഒപ്പം രവി തേജയും; വാൾട്ടയർ വീരയ്യ ട്രൈലെർ കാണാം

തെന്നിന്ത്യൻ സിനിമയുടെ മെഗാസ്റ്റാർ ചിരഞ്ജീവി നായകനായി എത്തുന്ന ഏറ്റവും പുതിയ ചിത്രമാണ് വാൾട്ടയർ വീരയ്യ. സംവിധായകൻ ബോബി കൊല്ലി ഒരുക്കിയ ഈ ചിത്രം ഈ വരുന്ന ജനുവരി പതിമൂന്നിന് സംക്രാന്തി റിലീസായി പ്രേക്ഷകരുടെ മുന്നിലെത്തും. അതിന് മുന്നോടിയായി ഇപ്പോൾ ഈ ചിത്രത്തിന്റെ ട്രൈലെർ റിലീസ് ചെയ്തിരിക്കുകയാണ്. ആരാധകർ ഏറെ നാളായി കാത്തിരുന്ന ഒരു പക്കാ ലോക്കൽ മാസ്സ് ചിരഞ്ജീവി ചിത്രമാണ് വാൾട്ടയർ വീരയ്യ എന്ന ഫീലാണ് ഈ ട്രൈലെർ നൽകുന്നത്. കിടിലൻ ആക്ഷനും, കോമെഡിയും പ്രണയവും എല്ലാം കോർത്തിണക്കി ഒരുക്കിയ ഈ കംപ്ലീറ്റ് എന്റെർറ്റൈനെർ ചിത്രത്തിൽ മറ്റൊരു തെലുങ്ക് സൂപ്പർ താരമായ രവി തേജയും നിർണ്ണായകൻ വേഷത്തിൽ എത്തുന്നുണ്ട്. ആരാധകർക്ക് ആവേശം പകരുന്ന തരത്തിലുള്ള ഒന്നാണ് രവി തേജ ചെയ്യുന്ന കഥാപാത്രമെന്നാണ് സൂചന.

മൈത്രി മൂവി മേക്കേഴ്സിന്റെ ബാനറിൽ നവീൻ യേർനേനിയും വൈ രവിശങ്കറും ചേർന്ന് നിർമ്മിച്ചിരിക്കുന്ന ഈ ചിത്രം ചിരഞ്ജീവിയുടെ 154-മത് ചിത്രമായാണ് എത്തുന്നത്. ഈ ചിത്രത്തിലെ ബോസ് പാർട്ടി ഗാനവും അതുപോലെ ചിരഞ്ജീവി- ശ്രുതി ഹാസൻ ടീമിന്റെ പ്രണയ ഗാനവും സൂപ്പർ ഹിറ്റായി മാറിയിട്ടുണ്ട്. ശ്രുതി ഹാസനെ കൂടാതെ കാതറീൻ ട്രീസയും അഭിനയിക്കുന്ന ഈ ചിത്രത്തിന് ക്യാമറ ചലിപ്പിച്ചത് ആർതർ എ വിൽ‌സൺ, എഡിറ്റ് ചെയ്തിരിക്കുന്നത് നിരഞ്ജൻ ദേവരമനേ എന്നിവരാണ്. റോക്ക്സ്റ്റാർ ദേവി ശ്രീ പ്രസാദ് ആണ് ഈ ചിത്രത്തിന്റെ സംഗീത സംവിധായകൻ. കോന വെങ്കട്ടും കെ ചക്രവർത്തി റെഡ്ഡിയും ചേർന്ന് തിരക്കഥ രചിച്ച ഈ ചിത്രത്തിന്റെ കഥയും സംഭാഷണവും രചിച്ചത് സംവിധായകൻ ബോബി കൊല്ലിയാണ്.