കാർബണിന്റെ പുതിയ ടീസർ ജനശ്രദ്ധ നേടുന്നു..!

ഫഹദ് ഫാസിൽ നായകൻ ആവുന്ന കാർബൺ എന്ന ചിത്രം ഈ വരുന്ന വെള്ളിയാഴ്ച മുതൽ കേരളത്തിൽ പ്രദർശനം ആരംഭിക്കുകയാണ്. പ്രശസ്ത ഛായാഗ്രാഹകനും സംവിധായകനുമായ വേണു രചനയും സംവിധാനവും നിർവഹിച്ച ഈ ചിത്രം പോയട്രി ഫിലിംസിന്റെ ബാനറിൽ സിബി തോട്ടുപുറം, നാവിസ് സേവ്യർ എന്നിവർ ചേർന്നാണ് നിർമ്മിച്ചിരിക്കുന്നത്. ഈ ചിത്രത്തിന്റെ ട്രൈലെർ, ഗാനങ്ങൾ തുടങ്ങിയവ വമ്പൻ ജനശ്രദ്ധ നേടിയിരുന്നു. ഇപ്പോഴിതാ റിലീസിന് മുൻപ് ഒരു പ്രീ-റിലീസ് ടീസർ കൂടി അണിയറ പ്രവർത്തകർ പുറത്തു വിട്ടിരിക്കുകയാണ്. ഈ ടീസറിന് മികച്ച ജനശ്രദ്ധയാണ് നേടിയെടുക്കാനാവുന്നതു. ഫഹദ് ഫാസിൽ എന്ന പേര് തന്നെയാണ് ഈ ചിത്രത്തിനെ പ്രേക്ഷകരുടെ ശ്രദ്ധകേന്ദ്രമാക്കുന്നതു എങ്കിലും ഫഹദിനൊപ്പം ഒരു മികച്ച താര നിര തന്നെ കാർബണിന്റെ ഭാഗം ആയിട്ടുണ്ട്.

നായികയായി മമത മോഹൻദാസും സഹതാരങ്ങളായി ദിലീഷ് പോത്തൻ, സൗബിൻ ഷാഹിർ, മണികണ്ഠൻ ആചാരി, വിജയ രാഘവൻ, നെടുമുടി വേണു, ഷറഫുദീൻ , കൊച്ചു പ്രേമൻ, പ്രവീണ, ചേതൻ ജയലാൽ എന്നിവരും ഈ ചിത്രത്തിൽ അഭിനയിക്കുന്നു. ബോളിവുഡിലെ രണ്ടു പ്രശസ്ത ടെക്നിഷ്യൻസ് ഈ ചിത്രത്തിൽ ജോലി ചെയ്തിട്ടുണ്ട്. സംഗീത സംവിധാനം നിർവഹിച്ച വിശാൽ ഭരദ്വാജ്ഉം അതുപോലെ ദൃശ്യങ്ങൾ ഒരുക്കിയ കെ യു മോഹനനും ആണവർ. ക്ലീൻ യു സർട്ടിഫിക്കറ്റ് ആണ് ഇന്നലെ സെൻസറിങ് കഴിഞ്ഞ ഈ ചിത്രത്തിന് ലഭിച്ചിരിക്കുന്നത്. ഒരു ത്രില്ലർ സ്വഭാവമുള്ള ഈ ചിത്രം എല്ലാത്തരം പ്രേക്ഷകരെയും ആകര്ഷിക്കുമെന്നു ട്രെയ്‌ലറും ടീസറും വീഡിയോ ഗാനങ്ങളും സൂചിപ്പിക്കുന്നു. ഈ ചിത്രത്തിന്റെ പോസ്റ്ററുകളും പ്രേക്ഷകരെ ആകർഷിക്കുന്നുണ്ട്.