25 വർഷങ്ങൾക്കു ശേഷം എ ആർ റഹ്മാൻ മലയാളത്തിൽ; ആട് ജീവിതത്തിൽ സംഗീതം ഒരുക്കുന്നത് റഹ്മാൻ എന്ന് സ്ഥിതീകരണം..!

ഇന്ത്യൻ സിനിമയിലെ സംഗീത മാന്ത്രികൻ എ ആർ റഹ്മാൻ മലയാള സിനിമയിലേക്ക് മടങ്ങിയെത്തുകയാണ്. ഓസ്കാർ പുരസ്‍കാരം അടക്കം ഒട്ടനവധി ദേശീയ അന്തർദേശീയ പുരസ്‌കാരങ്ങൾ സ്വന്തമാക്കിയിട്ടുള്ള, ഇന്ത്യയിലെ ഏറ്റവും വില പിടിപ്പുള്ള ഈ സംഗീത സംവിധായകൻ മലയാള സിനിമയിലേക്ക് മടങ്ങിയെത്തുന്നത് ബ്ലെസി സംവിധാനം ചെയ്യുന്ന ആട് ജീവിതം എന്ന ചിത്രത്തിന് സംഗീതം ഒരുക്കി കൊണ്ടാണ്. നേരത്തെ തന്നെ എ ആർ റഹ്മാൻ ആട് ജീവിതത്തിലൂടെ മലയാളത്തിൽ എത്തുമെന്ന് വാർത്തകൾ ഉണ്ടായിരുന്നു എങ്കിലും കഴിഞ്ഞ ദിവസമാണ് എ ആർ റഹ്മാൻ തന്നെ ആ വാർത്ത മാധ്യമങ്ങളോട് സ്ഥിതീകരിച്ചതു. ആട് ജീവിതം എ ആർ റഹ്മാന്റെ രണ്ടാമത്തെ മാത്രം മലയാള ചിത്രം ആയിരിക്കും. 25 വർഷം മുൻപാണ് അദ്ദേഹം തന്റെ ഒരേ ഒരു മലയാള ചിത്രം ചെയ്തത്. മോഹൻലാൽ നായകനായി അഭിനയിച്ചു സംഗീത് ശിവൻ സംവിധാനം ചെയ്ത സൂപ്പർ ഹിറ്റ് ചിത്രമായ യോദ്ധക്കു വേണ്ടിയാണു അന്ന് എ ആർ റഹ്മാൻ സംഗീത സംവിധാനവും പശ്ചാത്തല സംഗീതവും ഒരുക്കിയത്.

ആട് ജീവിതത്തിലെ നായകൻ പ്രിത്വിരാജ് സുകുമാരൻ ആണ്. ഫെബ്രുവരി രണ്ടാം വാരം മുതൽ ഷൂട്ടിങ് ആരംഭിക്കുന്ന ഈ ചിത്രം ഇതേ പേരിൽ ഉള്ള പ്രശസ്ത നോവലിന്റെ ചലച്ചിത്രാവിഷ്കാരമാണ്. ബെന്യാമിൻ ആണ് ഈ നോവൽ രചിച്ചത്. ഗൾഫ് രാജ്യങ്ങളിൽ വെച്ച് ഷൂട്ട് ചെയ്യുന്ന ഈ ചിത്രം വമ്പൻ ബഡ്ജറ്റിൽ ത്രീഡി ഫോർമാറ്റിൽ ആണ് ഒരുക്കുന്നത് എന്നാണ് റിപ്പോർട്ടുകൾ പറയുന്നത്. മലയാളം കൂടാതെ മറ്റു ഇന്ത്യൻ ഭാഷകളിലേക്കും ഈ ചിത്രം മൊഴിമാറ്റിയെത്തും എന്നും വാർത്തകൾ ഉണ്ട്. ഈ ചിത്രത്തിലെ കേന്ദ്ര കഥാപാത്രമായ നജീബിനെ അവതരിപ്പിക്കാനായി വമ്പൻ ഫിസിക്കൽ മേക് ഓവറിനാണ് പ്രിത്വി രാജ് തയ്യാറെടുക്കുന്നത്. ഈ ചിത്രത്തിന്റെ ആദ്യ ഷെഡ്യൂൾ കഴിഞ്ഞു തന്റെ സംവിധാന സംരംഭമായ മോഹൻലാൽ ചിത്രം ലൂസിഫർ ചെയ്യുന്ന സമയത്തു ശരീര ഭാരം കുറച്ചു തീരെ മെലിയാൻ ഉള്ള തയ്യാറെടുപ്പിൽ ആണ് പ്രിത്വി.