മകന്റെ പാട്ടുമായി അച്ഛന്റെ ചിത്രം; ആൻ ഇന്റർനാഷണൽ ലോക്കൽ സ്റ്റോറിക്ക് വേണ്ടി അർജുൻ അശോകന്റെ ഗാനം

പ്രശസ്ത ഹാസ്യ നടനായ ഹരിശ്രീ അശോകൻ ആദ്യമായി സംവിധാനം ചെയ്ത ചിത്രമാണ് ആൻ ഇന്റർനാഷണൽ ലോക്കൽ സ്റ്റോറി. അധികം വൈകാതെ തന്നെ റിലീസ് ചെയ്യാൻ ഒരുങ്ങുന്ന ഈ ചിത്രത്തിന്റെ പോസ്റ്ററുകളും ട്രൈലെറുമെല്ലാം ഇപ്പോഴേ പ്രേക്ഷകരുടെ ശ്രദ്ധ നേടിയെടുത്തു കഴിഞ്ഞു. ഇപ്പോഴിതാ ഈ ചിത്രത്തിലെ ഒരു ഗാനവും പ്രേക്ഷകരുടെ ശ്രദ്ധ നേടുകയാണ്. ഹരിശ്രീ അശോകന്റെ മകനും പ്രശസ്ത യുവ നടനുമായ അർജുൻ അശോകനാണ് ഈ ഗാനം ആലപിച്ചിരിക്കുന്നത് എന്നതാണ് ഇതിന്റെ സവിശേഷത. പട്ടണം മാറീട്ടും പട്ടിണി മാറീട്ടും എന്ന് തുടങ്ങുന്ന ഒരു ഗാനമാണ് അർജുൻ അശോകൻ ആലപിച്ചിരിക്കുന്നത്. വളരെ മനോഹരമായി തന്നെ അദ്ദേഹം ഈ ഗാനം ആലപിച്ചിട്ടും ഉണ്ട്. ദിനു മോഹൻ രചിച്ചിരിക്കുന്ന ഈ ഗാനത്തിന് സംഗീതം പകർന്നിരിക്കുന്നത് അരുൺ രാജ് ആണ്.

ഒരു കമ്പ്ലീറ്റ് കോമഡി എന്റെർറ്റൈനെർ ആയി ഒരുക്കിയിരിക്കുന്ന ഈ ചിത്രത്തിൽ രാഹുൽ മാധവ്, ദീപക്, ധർമജൻ, ബിജു കുട്ടൻ , മനോജ് കെ ജയൻ, ടിനി ടോം, ഇന്നസെന്റ്, ബൈജു, കലാഭവൻ ഷാജോൺ, സലിം കുമാർ, കുഞ്ചൻ, സുരേഷ് കൃഷ്ണ, ജഫാർ ഇടുക്കി, മാല പാർവതി, സുരഭി സന്തോഷ്, മമത ബൈജു, രേഷ്മ എന്നിവരാണ് പ്രധാന വേഷങ്ങൾ ചെയ്തിരിക്കുന്നത്. സംവിധായകനായ ഹരിശ്രീ അശോകനും ഈ ചിത്രത്തിൽ നിർണ്ണായകമായ ഒരു വേഷം ചെയ്തിട്ടുണ്ട്. യുവ രചയിതാക്കളായ രഞ്ജിത്, സനീഷ്, എബിൻ എന്നിവർ ചേർന്നാണ് ഈ ചിത്രത്തിന്റെ തിരക്കഥയും സംഭാഷണങ്ങളും രചിച്ചിരിക്കുന്നത്. എസ് സ്‌ക്വയർ സിനിമയുടെ ബാനറിൽ എം ഷിജിത് എന്നയാളാണ് ഈ ചിത്രത്തിന്റെ നിർമ്മാതാവ്