ആണ്പിള്ളേര് പോലും കുടിക്കാത്ത സാധനം; കള്ള് കുടിയുമായി അനിഖ സുരേന്ദ്രൻ; ഓ മൈ ഡാർലിംഗ് ടീസർ കാണാം

ബാലതാരമായി സിനിമയിൽ വന്ന് ഒരുപിടി മലയാളം, തമിഴ് ചിത്രങ്ങളിലൂടെ ശ്രദ്ധ നേടിയ അനിഖ സുരേന്ദ്രൻ ആദ്യമായി മലയാളത്തിൽ നായികയായി അഭിനയിച്ച ചിത്രമാണ് ഓ മൈ ഡാർലിംഗ്. ആഷ് ട്രീ വെഞ്ചുവേഴ്സിന്റെ ബാനറിൽ മനോജ് ശ്രീകണ്ഠ നിർമ്മാണം നിർവഹിക്കുന്ന ഈ ചിത്രം സംവിധാനം ചെയ്തിരിക്കുന്നത് ആൽഫ്രഡ്‌ ഡി സാമുവലാണ്. കഴിഞ്ഞ വർഷം ഇതിന്റെ ഫസ്റ്റ് ലുക്ക് പോസ്റ്റർ മെഗാസ്റ്റാർ മമ്മൂട്ടി റിലീസ് ചെയ്തിരുന്നു. ഇപ്പോഴിതാ ഇതിന്റെ ആദ്യ ടീസർ പുറത്തു വന്നിരിക്കുകയാണ്. മനോഹരമായൊരു കൗമാര പ്രണയകഥ പറയുന്ന ചിത്രമാണിതെന്ന സൂചനയാണ് ഈ ടീസർ നമ്മുക്ക് നൽകുന്നത്. മെല്‍വിന്‍ ജി ബാബു, മുകേഷ്, ലെന, ജോണി ആന്റണി, മഞ്ജു പിള്ള, വിജയരാഘവന്‍, ശ്രീകാന്ത് മുരളി, നന്ദു, ഡെയ്ന്‍ ഡേവിസ്, ഫുക്രു എന്നിവരും പ്രധാന വേഷങ്ങൾ ചെയ്യുന്ന ഈ ചിത്രം രചിച്ചിരിക്കുന്നത് ജിനീഷ് കെ ജോയ് ആണ്.

ഷാൻ റഹ്മാൻ സംഗീതം നല്കയ ഈ ചിത്രത്തിന് വേണ്ടി ക്യാമറ ചലിപ്പിച്ചത് അൻസാർ ഷാ, എഡിറ്റ് ചെയ്യുന്നത് ലിജോ പോൾ എന്നിവരാണ്. കഥ തുടരുന്നു എന്ന മലയാള ചിത്രത്തിലൂടെ ബാലതാരമായി അരങ്ങേറ്റം കുറിച്ച അനിഖ സുരേന്ദ്രൻ, ഫോർ ഫ്രണ്ട്സ്, ബാവൂട്ടിയുടെ നാമത്തിൽ, നീലാകാശം പച്ചക്കടൽ ചുവന്ന ഭൂമി, ഭാസ്കർ ദി റാസ്കൽ എന്നീ ചിത്രങ്ങളിലും വേഷമിട്ടിരുന്നു. തമിഴിലും കയ്യടി നേടിയ ഈ നടി, അജിത്തിനൊപ്പം അഭിനയിച്ച യെന്നൈ അറിന്താൽ, വിശ്വാസം എന്നിവയാണ് അവിടെ വമ്പൻ ഹിറ്റായ ചിത്രങ്ങൾ. വിജീഷ് പിള്ളയാണ് ഓ മൈ ഡാർലിംഗ് എന്ന ചിത്രത്തിന്റെ ക്രിയേറ്റിവ് ഡിറക്ടറായി ജോലി ചെയ്തിരിക്കുന്നത്.