മകളുടെ ജന്മദിനത്തിന് ഇളയ രാജയുടെ സൂപ്പർ ഹിറ്റ് ഗാനവുമായി അല്ലു അർജുൻ; അല്ലു അർജുനും മകളും അഭിനയിച്ച വീഡിയോ ഗാനം വൈറലാവുന്നു..!

തെലുങ്കിലെ സ്റ്റൈലിഷ് സ്റ്റാർ എന്നറിയപ്പെടുന്ന സൂപ്പർ താരമാണ് അല്ലു അർജുൻ. തെലുങ്കിൽ മാത്രമല്ല, കേരളത്തിലും ഒട്ടേറെ ആരാധകരുള്ള ഈ താരം മലയാളികളുടെ ഇടയിൽ മല്ലു അർജുൻ എന്ന പേരിലും അറിയപ്പെടുന്നു. ഇന്ത്യൻ സിനിമയിലെ ഏറ്റവും മികച്ച നർത്തകരിൽ ഒരാൾ കൂടിയായ അല്ലു അർജുൻ ഇപ്പോൾ അഭിനയിച്ചു കൊണ്ടിരിക്കുന്നത് സുകുമാർ സംവിധാനം ചെയ്യുന്ന പുഷ്പ എന്ന ചിത്രത്തിലാണ്. ഇതിലെ അല്ലു അർജുന്റെ ലുക്ക് സോഷ്യൽ മീഡിയയിൽ വളരെ വലിയ രീതിയിലാണ് ശ്രദ്ധ നേടിയെടുത്തത്. എന്നാലിപ്പോൾ അല്ലു അർജുൻ ആരാധകരും സിനിമാ പ്രേമികളും ഏറ്റെടുക്കുന്നത് തന്റെ മകൾക്കുള്ള ജന്മദിന സമ്മാനമായി അല്ലു അർജുൻ ഒരുക്കിയ ഒരു സോങ് വീഡിയോ ആണ്. 1990 ഇൽ മണി രത്‌നം സംവിധാനം ചെയ്തു ബേബി ശാമിലി കേന്ദ്ര കഥാപാത്രത്തെ അവതരിപ്പിച്ചു പുറത്തു വന്ന ചിത്രമാണ് അഞ്ജലി. ഈ ചിത്രത്തിന് വേണ്ടി ഇളയ രാജ ഈണമിട്ട അഞ്ജലി അഞ്ജലി എന്ന് തുടങ്ങുന്ന ഗാനമാണ് മകൾക്കുള്ള വീഡിയോ ഒരുക്കാൻ അല്ലു അർജുൻ ഉപയോഗിച്ചിരിക്കുന്നത്.

ഇതിൽ അല്ലു അർജുന്റെ മകൾ അല്ലു അർഹ തന്നെയാണ് അഭിനയിച്ചിരിക്കുന്നതും. മകൾക്കൊപ്പം അല്ലു അർജുനും ഈ വീഡിയോയിൽ പ്രത്യക്ഷപ്പെടുന്നുണ്ട്. ഒൻപതു വർഷം മുൻപ് വിവാഹിതരായ അല്ലു അർജുൻ – സ്നേഹ റെഡ്‌ഡി ദമ്പതികൾക്ക് ഒരു മകനും മകളുമാണ് ഉള്ളത്. മൂത്ത കുട്ടിയായ മകന്റെ പേര് അല്ലു അയാൻ എന്നാണ്. ഗണേഷ് സ്വാമി കൊറിയോഗ്രാഫി ചെയ്ത ഈ വീഡിയോക്കു ക്യാമറ ചലിപ്പിച്ചത് സൂര്യയാണ്. അല്ലു അർജുന്റെ മകൻ അല്ലു അയാനും ഈ വീഡിയോയിൽ അച്ഛനും അനുജത്തിക്കുമൊപ്പം പ്രത്യക്ഷപ്പെടുന്നുണ്ട്. മധു എഡിറ്റിങ് നിർവഹിച്ചിരിക്കുന്ന ഈ ഗാനം അല്ലു അർജുന്റെ യൂട്യൂബ് ചാനലിൽ ആണ് റിലീസ് ചെയ്തിരിക്കുന്നത്. നവംബർ ഇരുപതിന്‌ റിലീസ് ചെയ്ത ഈ വീഡിയോ ഇതിനോടകം പതിനൊന്നു ലക്ഷത്തിലധികം വ്യൂസ് നേടിക്കഴിഞ്ഞു.