കഠിന വർക്ഔട്ടിൽ ജ്യോതിക; മമ്മൂട്ടി ചിത്രത്തിനാണോ എന്ന് ആരാധകർ

തമിഴിലെ സൂപ്പർ നായികയായ ജ്യോതിക വീണ്ടും മലയാളത്തിലേക്ക് എത്താനുള്ള ഒരുക്കത്തിലാണ്. മെഗാസ്റ്റാർ മമ്മൂട്ടിയുടെ നായികയായി, ജിയോ ബേബി സംവിധാനം ചെയ്യുന്ന കാതൽ എന്ന ചിത്രത്തിലൂടെയാണ് ജ്യോതിക മലയാളത്തിൽ എത്തുന്നത്. പ്രിയദർശൻ ഒരുക്കിയ രാക്കിളിപ്പാട്ട്, ടി കെ രാജീവ് കുമാർ ഒരുക്കിയ സീത കല്യാണം എന്നീ മലയാള ചിത്രങ്ങളിലാണ് ജ്യോതിക ഇതിന് മുൻപ് അഭിനയിച്ചത്. ഏതായാലും ഒരു ഫീൽ ഗുഡ് ഫാമിലി ഡ്രാമയായി ജിയോ ബേബി ഒരുക്കാൻ പോകുന്ന കാതൽ എന്ന ചിത്രത്തിൽ അടുത്ത തിങ്കളാഴ്ച ജ്യോതിക ജോയിൻ ചെയ്യുമെന്നാണ് സൂചന. എന്നാൽ ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത് ജ്യോതിക പങ്ക് വെച്ച ഒരു വീഡിയോയാണ്. അതികഠിനമായി ജിമ്മിൽ വർക്ക് ഔട്ട് ചെയ്യുന്ന വീഡിയോയാണ് ഈ നടി പങ്കു വെച്ചിരിക്കുന്നത്. കഴിഞ്ഞ ദിവസം തന്റെ പിറന്നാൾ ആഘോഷിച്ച ജ്യോതിക വീഡിയോ പങ്ക് വെച്ചു കൊണ്ട് കുറിക്കുന്നത് ആരോഗ്യത്തിന്റെ പ്രാധാന്യത്തെ കുറിച്ചാണ്.

എന്നാൽ ജ്യോതികയുടെ ഈ പരിശ്രമം കണ്ട മലയാള സിനിമാ പ്രേമികൾ ചോദിക്കുന്നത് മമ്മൂട്ടി ചിത്രത്തിന് വേണ്ടിയാണോ ജ്യോതിക ഈ കിടിലൻ വർക്ക് ഔട്ടുകൾ ചെയ്ത് ഫിറ്റ് ആവാൻ നോക്കുന്നത് എന്നാണ്. മമ്മൂട്ടിയോടൊപ്പം ആദ്യമായാണ് ജ്യോതിക അഭിനയിക്കാൻ പോകുന്നത്. സൂര്യയുമായുള്ള വിവാഹത്തിന് ശേഷം അഭിനയ രംഗത്ത് നിന്ന് മാറി നിന്നിരുന്ന ജ്യോതിക 2015 ഇൽ റിലീസ് ചെയ്ത 36 വയതിനിലെ എന്ന ചിത്രത്തിലൂടെ ആണ് തിരിച്ചു വന്നത്. മലയാളി സംവിധായകൻ റോഷൻ ആൻഡ്രൂസ് സംവിധാനം ചെയ്ത ഈ ചിത്രം മലയാള ചിത്രമായ ഹൌ ഓൾഡ് ആർ യു ന്റെ റീമേക് ആയിരുന്നു. അതിനു ശേഷം മകളിർ മട്ടും, നാച്ചിയാർ, ചെക്ക ചിവന്ത വാനം, കാട്രിൻ മൊഴി, രാച്ചസി, തമ്പി, ജാക്ക്പോട്ട്, പൊന്മകൾ വന്താൽ, ഉടൻ പിറപ്പെ എന്നീ ചിത്രങ്ങളിലും ജ്യോതിക അഭിനയിച്ചു.