ബോക്സ് ഓഫീസിൽ കുതിപ്പ് തുടർന്ന് മെഗാസ്റ്റാറിന്റെ കണ്ണൂർ സ്‌ക്വാഡ്; പുത്തൻ വീഡിയോ ഗാനം കാണാം.

മലയാളത്തിന്റെ മഹാനടൻ മമ്മൂട്ടി നായകനായ കണ്ണൂർ സ്‌ക്വാഡ് ഗംഭീര പ്രേക്ഷക പ്രതികരണം നേടി സൂപ്പർ ഹിറ്റ് വിജയമാണ് നേടിയത്. 50 കോടി ആഗോള കളക്ഷനും പിന്നിട്ട് കുതിച്ച ഈ ചിത്രം ഇപ്പോൾ മമ്മൂട്ടിയുടെ കരിയറിലെ ഏറ്റവും വലിയ രണ്ടാമത്തെ ഹിറ്റെന്ന പദവിയാണ് നേടിയെടുത്തിരിക്കുന്നത്. നവാഗതനായ റോബി വർഗീസ് രാജ് സംവിധാനം ചെയ്ത ഈ ചിത്രം നിർമ്മിച്ചിരിക്കുന്നത് മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെയാണ്. ഈ ബിഗ് ബഡ്ജറ്റ് ക്രൈം ഇൻവെസ്റ്റിഗേഷൻ ത്രില്ലർ രചിച്ചത് നടൻ റോണി ഡേവിഡ് രാജ്, മുഹമ്മദ് റാഫി എന്നിവർ ചേർന്നാണ്. ഇപ്പോഴിതാ ഈ ചിത്രത്തിലെ സൂപ്പർ ഹിറ്റായ ഒരു ഗാനത്തിന്റെ വീഡിയോ പുറത്ത് വിട്ടിരിക്കുകയാണ് അണിയറ പ്രവർത്തകർ. മമ്മൂട്ടി കമ്പനിയുടെ ഒഫീഷ്യൽ യൂട്യൂബ് ചാനലിൽ കൂടിയാണ് ഈ വീഡിയോ ഗാനം റിലീസ് ചെയ്തിരിക്കുന്നത്.

മൃദു ഭാവേ ദൃഢ കൃത്യേ എന്ന വരികളോടെ തുടങ്ങുന്ന ഈ ഗാനത്തിന്റെ സംഗീതവും ഇതിലെ ദൃശ്യങ്ങളും മികച്ച പ്രേക്ഷക ശ്രദ്ധ നേടിയിരുന്നു. ഗംഭീരമായാണ് സംവിധായകൻ റോബി ഈ ഗാനത്തിലെ ദൃശ്യങ്ങൾ ഒരുക്കിയിരിക്കുന്നത്. ക്രിമിനലുകളെ തിരഞ്ഞു കൊണ്ടുള്ള പോലീസ് സംഘത്തിന്റെ യാത്രയാണ് ഈ ഗാനത്തിലൂടെ പ്രേക്ഷകരുടെ മുന്നിലെത്തിച്ചിരിക്കുന്നത്. സുഷിൻ ശ്യാം സംഗീതമൊരുക്കിയ ഈ മനോഹരമായ ഗാനത്തിന് വരികൾ രചിച്ചത് വിനായക് ശശി കുമാർ, ബാൻജോ, റബാബ്- തപസ് റോയ് എന്നിവർ ചേർന്നാണ്. സുഷിൻ ശ്യാം, ശ്രേയ രൂപേഷ്, ഗൗരി എസ്, പ്രിജിത്, ആദിത്യ അജയ്, ചിന്മയി കിരൺലാൽ എന്നിവർ ചേർന്നാണ് ഈ ഗാനം ആലപിച്ചിരിക്കുന്നത്. മമ്മൂട്ടിയോടൊപ്പം അസീസ് നെടുമങ്ങാട്, ശബരീഷ് വർമ്മ, റോണി ഡേവിഡ് രാജ് എന്നിവരും ഈ ഗാനരംഗത്തിൽ അഭിനയിച്ചിട്ടുണ്ട്.