ബീസ്റ്റും കെ ജി എഫ് 2 ഉം തമ്മിലുള്ള ബോക്സ് ഓഫീസ് യുദ്ധം; വമ്പൻ പ്രസ്‍താവനയുമായി യാഷ്..

ഇന്ത്യൻ സിനിമാ പ്രേമികൾ ഒന്നടങ്കം ഇപ്പോൾ കാത്തിരിക്കുന്ന ചിത്രമാണ് പ്രശാന്ത് നീൽ സംവിധാനം ചെയ്തു, റോക്കിങ് സ്റ്റാർ യാഷ് നായകനായി എത്തുന്ന കെ ജി എഫ് 2. ബ്രഹ്മാണ്ഡ ഹിറ്റായ കന്നഡ ചിത്രം കെ ജി എഫിന്റെ രണ്ടാം ഭാഗം ഇന്ന് ഇന്ത്യൻ സിനിമയിലെ ഏറ്റവും ഹൈപ്പുള്ള ചിത്രമാണ്. ഏപ്രിൽ പതിനാലിന് ആഗോള റിലീസ് ആയി അഞ്ചു ഭാഷകളിൽ റിലീസ് ചെയ്യാൻ പോകുന്ന ഈ ചിത്രത്തിന്റെ ട്രൈലെർ കഴിഞ്ഞ ദിവസമാണ് പുറത്തു വിട്ടത്‌. അഞ്ചു ഭാഷകളിൽ ആയി റിലീസ് ചെയ്ത ഈ ട്രെയിലറിന് വമ്പൻ പ്രതികരണമാണ് ലഭിക്കുന്നത്. യൂട്യൂബിൽ റെക്കോർഡുകൾ കടപുഴക്കുന്ന ഈ ട്രൈലെർ ലോഞ്ച് ചെയ്യുന്ന ചടങ്ങിൽ, ചിത്രത്തിലെ നായകനായ യാഷ് പറഞ്ഞ വാക്കുകൾ ഏറെ ശ്രദ്ധേയമാണ്. കെ ജി എഫ് 2 റിലീസ് ചെയ്യുന്നതിന് തൊട്ടു മുൻപത്തെ ദിവസമാണ് ദളപതി വിജയ് നായകനായ ബിഗ് ബഡ്ജറ്റ് തമിഴ് ചിത്രമായ ബീസ്റ്റ് റിലീസ് ചെയ്യുന്നത്.

ബോക്സ് ഓഫീസിൽ ബീസ്റ്റും, കെ ജി എഫ് 2 ഉം തമ്മിലുള്ള പോരാട്ടമായാണ് പ്രേക്ഷകർ ഇതിനെ കണക്കാക്കുന്നത്. ഇ യുദ്ധത്തിൽ ആര് ജയിക്കും എന്നതും ഏവരും ആകാംഷയോടെ ഉറ്റു നോക്കുന്നുണ്ട്. എന്നാൽ യാഷ് പറയുന്നത് യുദ്ധം ചെയ്യാനും മത്സരിക്കാനും ഇത് തിരഞ്ഞെടുപ്പല്ല, പകരം സിനിമയാണ് എന്നാണ്. രണ്ടു വലിയ ചിത്രങ്ങൾ അടുത്തടുത്ത് റിലീസ് ചെയ്യുന്നു എന്ന് മാത്രമേ ഉള്ളു എന്നും, താൻ എന്തായാലും ബീസ്റ്റ് കാണും എന്നാണ്. അതുപോലെ വിജയ് ആരാധകർ കെ ജി എഫ് 2 ഉം കാണുമെന്നു താൻ പ്രതീക്ഷിക്കുന്നു എന്നും അദ്ദേഹം പറയുന്നു. മാത്രമല്ല, വിജയ് സർ തന്റെ സീനിയർ ആണെന്നും അവരോടൊക്കെ മത്സരിക്കാൻ അല്ല, ബഹുമാനത്തോടെ അവരുടെ ജോലികൾ കാണാനും പഠിക്കാനും ആണ് ഇഷ്ടമെന്നും യാഷ് പറയുന്നു.