ഹിറ്റ് ചിത്രം മേപ്പടിയാന് ശേഷം മുകുന്ദൻ നായകനാകുന്ന പുതിയ ചിത്രം പൂർത്തിയായി..!

ഉണ്ണി മുകുന്ദനും അപര്‍ണാ ബാലമുരളിയും ഒന്നിക്കുന്ന ഏറ്റവും പുതിയ ചിത്രത്തിന്റെ ഷൂട്ടിംഗ് പൂർത്തിയായി. ഉണ്ണി മുകുന്ദൻ തന്നെയാണ് തന്റെ ഇൻസ്റ്റഗ്രാമിൽ പോസ്റ്റ് ചെയ്ത ലൊക്കേഷൻ വീഡിയോ വഴി ഈ ചിത്രം പൂർത്തിയായതായി അറിയിച്ചത്. ഈ ചിത്രത്തിന്റെ രണ്ടാം ഷെഡ്യൂൾ കഴിഞ്ഞ മാസം ചെറുതോണിയിൽ ആണ് ആരംഭിച്ചത്. പേരിടാത്ത ഈ ചിത്രം അരുണ്‍ബോസ് ആണ് സംവിധാനം ചെയ്യുന്നത്. പ്രശസ്ത സംവിധായകന്‍ സലിം അഹമ്മദ് നിര്‍മ്മിക്കുന്ന രണ്ടാമത്തെ ചിത്രമെന്ന പ്രത്യേകതയും ഇതിനുണ്ട്. കഴിഞ്ഞ ഡിസംബറില്‍ എറണാകുളത്ത് ആണ് ഈ ചിത്രത്തിന്റെ ഷൂട്ടിംഗ് ആരംഭിച്ചത്. ഇടയ്ക്കു നിർത്തി വെച്ച ഇതിന്റെ ഷൂട്ടിംഗ് പിന്നീട് ജനുവരിയിൽ ആണ് ആരംഭിച്ചത്.

ടോവിനോ തോമസ് നായകനായ ലൂക്കയ്ക്ക് ശേഷം അരുണും മൃദുല്‍ ജോര്‍ജും ചേർന്ന് തിരക്കഥ രചിച്ച ചിത്രം കൂടിയാണിത്. മാലാപാര്‍വ്വതി, ജൂഡ് ആന്റണി ജോസെഫ്, ജാഫര്‍ ഇടുക്കി എന്നിവരാണ് ഈ ചിത്രത്തിലെ മറ്റ് പ്രധാനകഥാപാത്രങ്ങളെ അവതരിപ്പിക്കുന്നത്. ഉണ്ണി മുകുന്ദന്റേതായി അവസാനം പുറത്തിറങ്ങിയ ചിത്രം മേപ്പടിയാൻ ആണ്. ഉണ്ണി മുകുന്ദൻ തന്നെ നിർമ്മിച്ച ഈ ചിത്രം അദ്ദേഹത്തിന്റെ കരിയറിലെ ഏറ്റവും വലിയ സോളോ ഹിറ്റ് ആയി മാറിയിരുന്നു. ജയകൃഷ്ണന്‍ എന്ന നാട്ടിന്‍പുറത്തുകാരനായിട്ടു ഉണ്ണി മുകുന്ദൻ അഭിനയിച്ച ഈ ചിത്രം സംവിധാനം ചെയ്തത് നവാഗതനായ വിഷ്ണു മോഹൻ ആണ്. മോഹൻലാൽ നായകനായി എത്തിയ ജീത്തു ജോസഫ് ചിത്രം ട്വൽത് മാൻ ആയിരിക്കും ഉണ്ണി അഭിനയിച്ചു റിലീസ് ചെയ്യാൻ പോകുന്ന അടുത്ത ചിത്രം. മോഹൻലാൽ- പൃഥ്വിരാജ് ചിത്രമായ ബ്രോ ഡാഡിയിൽ അതിഥി വേഷം ചെയ്ത് കൊണ്ടും ഉണ്ണി മുകുന്ദൻ എത്തിയിരുന്നു. ഒറ്റിറ്റി റിലീസ് ആയാണ് ബ്രോ ഡാഡി എത്തിയത്.