മീശമാധവനിലെ ത്രിവിക്രമനു ശേഷം പ്രേക്ഷകരെ പൊട്ടിചിരിപ്പിച്ചു കൊണ്ട് ഷെർലക് ടോംസിലെ എസ് ഐ ഷിന്റോ എന്ന പെടലി.

മലയാളി സിനിമ പ്രേക്ഷകരെ കാലാകാലങ്ങളായി പല തരം “പെടലി” കഥാപാത്രങ്ങൾ പൊട്ടിചിരിപ്പിച്ചിട്ടുണ്ട്. എന്നാൽ അതിൽ ഏറ്റവും പ്രശസ്തമായ ഒരു പെടലി കഥാപാത്രം ആണ് മീശമാധവൻ എന്ന സൂപ്പർ ഹിറ്റ് ദിലീപ്-ലാൽ ജോസ് ചിത്രത്തിലെ ത്രിവിക്രമൻ എന്ന പെടലി കഥാപാത്രം. അന്തരിച്ചു പോയ നടനും സംവിധായകനുമായ കൊച്ചിൻ ഹനീഫിക്കയാണ് പ്രേക്ഷകർ എന്നും സ്നേഹിക്കുന്ന ത്രിവിക്രമൻ എന്ന ആ പെടലി കഥാപാത്രത്തെ അനശ്വരമാക്കിയത്.

ഇപ്പോഴിതാ പ്രേക്ഷകരെ പൊട്ടിചിരിപ്പിച്ചു കൊണ്ട് മറ്റൊരു പെടലി കഥാപാത്രം കൂടി എത്തിയിരിക്കുന്നു. ഷെർലക് ടോംസ് എന്ന ഷാഫി- ബിജു മേനോൻ ചിത്രത്തിൽ പ്രശസ്ത നടനും മിമിക്രി താരവുമായ കോട്ടയം നസീർ അവതരിപ്പിച്ച എസ് ഐ ഷിന്റോ ആണ് ആ പുതിയ പെടലി.

ഒരുപാട് നാളുകൾക്കു ശേഷം കോട്ടയം നസീറിന് ലഭിച്ച ഒരു മിന്നുന്ന കോമഡി കഥാപാത്രം ആണ് കഴുത്തിൽ പ്ലാസ്റ്റർ ഇട്ടു നടക്കുന്ന പെടലിയായ എസ് ഐ ഷിന്റോ എന്ന കഥാപാത്രം. ഷിന്റോയുടെ ഒപ്പം സന്തത സഹചാരി ആയി ഫക്രു എന്ന് വിളിക്കപ്പെടുന്ന കോൺസ്റ്റബിൾ ഫക്രുദീനും ഉണ്ട്. ഹാരിഷ് കണാരൻ ആണ് ഈ വേഷം അവതരിപ്പിക്കുന്നത്. ഇവർ രണ്ടു പേരും ചേർന്നൊരുക്കുന്ന കോമഡി നമ്പറുകൾ തിയേറ്ററിൽ പൊട്ടിച്ചിരി പടർത്തി പ്രേക്ഷകരെ കയ്യിലെടുക്കുന്ന കാഴ്ചയാണ് കാണാൻ കഴിയുന്നത്.

രണ്ടു പേരുടെയും ഓൺസ്‌ക്രീൻ കെമിസ്ട്രിയെ കിടിലൻ എന്ന് തന്നെ വേണം വിശേഷിപ്പിക്കാൻ. കോമഡി ത്രില്ലർ ആയി ഒരുക്കിയ ഈ ചിത്രം നേടുന്ന വലിയ വിജയത്തിൽ ഒരു നിർണ്ണായക സ്ഥാനം തന്നെയാണ് കോട്ടയം നസീർ -ഹാരിഷ് കണാരൻ ജോഡി വഹിക്കുന്നതെന്നു സംശയമൊന്നുമില്ലാതെ തന്നെ നമ്മുക്ക് പറയാൻ സാധിക്കും.