ലുസിഫെർ 2 വരുന്നു; ഡബിൾ റോളിൽ മോഹൻലാൽ?

മലയാള സിനിമാ ചരിത്രത്തിലെ ഏറ്റവും വലിയ വിജയത്തിലേക്ക് കുതിക്കുകയാണ് മോഹൻലാൽ ചിത്രമായ ലുസിഫെർ. പൃഥ്വിരാജ് സുകുമാരൻ ആദ്യമായി സംവിധാനം ചെയ്ത ഈ ചിത്രം ഇതിനോടകം ആഗോള കളക്ഷൻ ആയി നേടിയത് ഇരുപത് ദിവസം കൊണ്ട് നൂറ്റി പതിനെട്ട് കോടിയോളം രൂപയാണ്‌. ഈ ചിത്രത്തിന്റെ ആഗോള ബിസിനസ് ആണെങ്കിൽ നൂറ്റിയന്പത് കോടിയോളം ആയി കഴിഞ്ഞു. ഇപ്പോഴിതാ ഈ ചിത്രത്തിന്റെ രണ്ടാം ഭാഗം ഒരുങ്ങുന്നു എന്നാണ് സൂചനകൾ വരുന്നത്. കഴിഞ്ഞ ദിവസം ലുസിഫെറിലെ മോഹൻലാൽ ന്റെ ഖുറേഷി അബ്രഹാം എന്ന കഥാപാത്രത്തിന്റെ പോസ്റ്റർ പൃഥ്വിരാജ് പുറത്ത് വിട്ടിരുന്നു. അതിനൊപ്പം അദ്ദേഹം നൽകിയ ക്യാപ്‌ഷനും ഒരു രണ്ടാം ഭാഗം എന്ന സൂചന നൽകിയിരുന്നു. അതിനു മുൻപ് തന്നെ പൃഥ്വിരാജ്, മുരളി ഗോപി എന്നിവർ ഇട്ട ഫേസ്ബുക്ക്, ട്വിറ്റർ പോസ്റ്റുകളും ലുസിഫെർ 2 എന്ന സൂചനകൾ ആണ് ആരാധകർക്കും പ്രേക്ഷകർക്കും നല്കിയത്.

ലുസിഫെർ രണ്ടാം ഭാഗത്തിൽ മോഹൻലാൽ ഡബിൾ റോളിൽ ആണ് എത്തുക എന്നുള്ള നിഗമനത്തിലും ആരാധകർ എത്തുന്നു. കാരണം സ്റ്റീഫൻ നെടുമ്പള്ളി തന്നെയാണ് അബ്രഹാം ഖുറേഷി എന്ന് ചിത്രത്തിൽ ഒരിടത്തും പറയുന്നില്ല. മാത്രമല്ല മുരളി ഗോപി പങ്കു വെച്ച കറുപ്പും വെളുപ്പും ഇട്ട കുതിരകളുടെ ചിത്രവും ആ ഒരു ചിന്തയിലേക്ക് പ്രേക്ഷകരെ എത്തിക്കുന്നു. ഏതായാലും ലുസിഫെർ മലയാള സിനിമയിലെ എല്ലാ കളക്ഷൻ റെക്കോർഡുകളും തകർക്കുമ്പോൾ ആരാധകർ ആവേശത്തിൽ ആണ്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ഈ ചിത്രത്തിൽ വിവേക് ഒബ്രോയ്‌, മഞ്ജു വാര്യർ, ടോവിനോ തോമസ് എന്നിവരും പ്രധാന വേഷങ്ങൾ ചെയ്തിട്ടുണ്ട്.