മോഹൻലാലിന് പിന്നാലെ സംവിധാന രംഗത്തേക്ക് മമ്മൂട്ടിയും ?

മെഗാ സ്റ്റാർ മമ്മൂട്ടി നായകനായി എത്തുന്ന ഭീഷ്മ പർവ്വം എന്ന മാസ്സ് ചിത്രം മാർച്ച് മൂന്നിന് റിലീസ് ചെയ്യുകയാണ്. അമൽ നീരദ് നിർമ്മിക്കുകയും സംവിധാനം ചെയ്യുകയും ചെയ്ത ഈ മാസ്സ് ചിത്രം രചിച്ചിരിക്കുന്നത് സംവിധായകനും ദേവദത് ഷാജി എന്ന പുതുമുഖവും ചേർന്നാണ്. ഇപ്പോൾ അതിന്റെ പ്രചാരണ പരിപാടികളിൽ സജീവമാണ് മമ്മൂട്ടി. അതിന്റെ ഭാഗമായി ഓൺലൂകേർസ് മീഡിയക്കു നൽകിയ അഭിമുഖത്തിൽ അദ്ദേഹം പറഞ്ഞ ചില കാര്യങ്ങൾ ശ്രദ്ധ നേടുകയാണ്. സംവിധാന മോഹം ഉണ്ടോ എന്ന ചോദ്യത്തിന് മമ്മൂട്ടി പറഞ്ഞ മറുപടി ആണ് ഏറെ വൈറൽ ആവുന്നത്. പണ്ട് ആ ആഗ്രഹം ഉണ്ടായിരുന്നു എന്നും, പക്ഷെ തന്നെ കൊണ്ട് അതിനു കഴിയില്ല എന്ന് തോന്നിയത് കൊണ്ട് ആ ആഗ്രഹം ഉപേക്ഷിച്ചു എന്നുമാണ് മമ്മൂട്ടി പറയുന്നത്. അതുപോലെ താൻ സംവിധാനം ചെയ്തില്ലെങ്കിലും ഇവിടെ സിനിമകൾ ഉണ്ടാവുമെന്നും താൻ സിനിമ സംവിധാനം ചെയ്തില്ല എന്ന് പറഞ്ഞു സമരം ചെയ്യാനൊന്നും ആരും വരില്ല എന്നും അദ്ദേഹം പറയുന്നു.

ഒരു നടൻ ആയി നിൽക്കാൻ ആണ് കൂടുതൽ ഇഷ്ടപ്പെടുന്നത് എന്നും നല്ല ഒരു നടൻ ആണെന്ന് ഇനിയും തെളിയിക്കട്ടെ എന്നും മമ്മൂട്ടി പറഞ്ഞു. സൂപ്പർ താരം മോഹൻലാൽ, യുവ സൂപ്പർ താരം പൃഥ്വിരാജ് എന്നിവർ സംവിധായകർ ആയിരുന്നു. ആ സമയത്തു ആണ് മമ്മൂട്ടിയും സംവിധായകൻ ആയേക്കാം എന്ന വാർത്ത വരുന്നത്. ഏതായാലും അതിനു താനില്ല എന്ന് വ്യക്തമാക്കിയിരിക്കുകയാണ് മെഗാ സ്റ്റാർ. പണ്ട് മമ്മൂട്ടി സംവിധായകൻ ആവാൻ ആഗ്രഹിച്ചിരുന്ന കാര്യവും തന്നോട് തിരക്കഥ ചോദിച്ച കാര്യവും നടൻ ശ്രീനിവാസൻ ഒരു ചാനൽ പരിപാടിയിൽ വെളിപ്പെടുത്തിയിരുന്നു. അതിനു ശേഷം അദ്ദേഹം ആ ആഗ്രഹം ഉപേക്ഷിച്ചതായി ശ്രീനിവാസൻ പറഞ്ഞിരുന്നു. അത് തന്നെയാണ് ഇപ്പോൾ മമ്മൂട്ടിയും തുറന്നു പറയുന്നത്.