രാമലീലക്ക് അഭിനന്ദന പ്രവാഹവുമായി സിനിമ ലോകം..!

ജനപ്രിയ നായകൻ ദിലീപ് നായകനായ രാമലീല വൻ പ്രേക്ഷകാഭിപ്രായം നേടി കുതിക്കുകയാണ് ഇപ്പോൾ. നവാഗതനായ അരുൺ ഗോപി സംവിധാനം ചെയ്ത ഈ പൊളിറ്റിക്കൽ ത്രില്ലർ രചിച്ചിരിക്കുന്നത് പ്രശസ്ത തിരക്കഥാകൃത്തും സംവിധായകനുമായ സച്ചിയാണ്. മുളകുപാടം ഫിലിമ്സിന്റെ ബാനറിൽ ടോമിച്ചൻ മുളകുപാടം നിർമ്മിച്ച ഈ ചിത്രം ഒരുപാട് പ്രതിസന്ധികൾ നേരിട്ടതിനു ശേഷമാണു ഇപ്പോൾ റിലീസ് ചെയ്തത്. എന്നാൽ ഇപ്പോൾ ചിത്രത്തിന് എല്ലാ വശത്തു നിന്നും അഭിനന്ദനങ്ങളുടെ പ്രവാഹമാണ്. സിനിമാ മേഖലയിൽ നിന്നും ഒട്ടനവധിപ്പേരാണ് രാമലീല കണ്ടു അഭിനന്ദനങ്ങളുമായി രംഗത്ത് വന്നിരിക്കുന്നത്.

വളരെ സമർത്ഥമായി ഒരുക്കിയ ഒരു പൊളിറ്റിക്കൽ ത്രില്ലർ എന്നാണ് പ്രശസ്ത സംവിധായകൻ രഞ്ജിത് ശങ്കർ രാമലീലയെ പറ്റി പറഞ്ഞിരിക്കുന്നത്. ദിലീപിനും അരുൺ ഗോപിക്കും സച്ചിക്കും അതുപോലെ ടോമിച്ചൻ മുളകുപാടത്തിനും ആശംസകളും പറഞ്ഞിട്ടുണ്ട് രഞ്ജിത് ശങ്കർ.

കഴിഞ്ഞ ദിവസം വിനീത് ശ്രീനിവാസനും ചിത്രത്തെ അഭിനന്ദിച്ചു കൊണ്ട് വിശദമായ ഫേസ്ബുക് പോസ്റ്റ് ഇട്ടിരുന്നു. അരുൺ ഗോപിയുടെ മികച്ച സംവിധാനത്തെ പ്രകീർത്തിച്ച വിനീത് സച്ചിയുടെ കരിയർ ബെസ്റ്റ് തിരക്കഥയാണ് രാമലീലയുടേത് എന്നും പറഞ്ഞു. അതോടൊപ്പം ദിലീപിന്റെയും കലാഭവൻ ഷാജോണിന്റേയും പ്രകടനങ്ങളും എടുത്തു പറഞ്ഞ വിനീത് ഗോപി സുന്ദർ ഒരുക്കിയ പശ്ചാത്തല സംഗീതത്തെയും അതുപോലെ എല്ലാ പ്രതിസന്ധികളെയും തരണം ചെയ്തു ഈ ചിത്രം പ്രദർശനത്തിന് എത്തിച്ച ടോമിച്ചൻ മുളകുപാടത്തെയും അഭിനന്ദിച്ചു.

രാമലീല കണ്ടു എന്നും ഈ ചിത്രം അതിഗംഭീരം ആയിട്ടുണ്ട് എന്നനുമാണ് പുലി മുരുകൻ സംവിധാനം ചെയ്ത വൈശാഖ് പ്രതികരിച്ചത്. അരുൺ ഗോപിയെ പ്രശംസ കൊണ്ട് മൂടിയ വൈശാഖ്, മറ്റുള്ളവരെയും എടുത്തു പറഞ്ഞു അഭിനന്ദിച്ചു.

അരുൺ ഗോപി അരങ്ങേറ്റം അസലാക്കി എന്നായിരുന്നു മാർത്താണ്ഡൻ എന്ന പ്രശസ്ത സംവിധായകന്റെ പ്രതികരണം.

ഒരു മികച്ച പൊളിറ്റിക്കൽ ത്രില്ലർ ആണ് രാമലീല എന്ന് സംവിധായകൻ ബോബൻ സാമുവൽ പറഞ്ഞപ്പോൾ രാമലീലയുടെ വിജയത്തിൽ ദിലീപിനെയും രാമലീല ടീമിനെയും അഭിനന്ദിച്ചു കൊണ്ട് നിർമ്മാതാവ് ആഷിക് ഉസ്മാനും ഫേസ്ബുക്കിലൂടെ രംഗത്ത് വന്നു.