ടോവിനോ തോമസിന്റെ കരിയർ ബെസ്റ്റ് പെർഫോമൻസ് ആണ് ആൻഡ് ദി ഓസ്കാർ ഗോസ് ടുവിൽ എന്ന് സലിം കുമാർ..!

സലിം അഹമ്മദ് സംവിധാനം ചെയ്ത നാലാമത്തെ ചിത്രമായ ആൻഡ് ദി ഓസ്കാർ ഗോസ് ടു പ്രേക്ഷകരേയും നിരൂപകരേയും ഒരുപോലെ ആകർഷിച്ചു കൊണ്ട് തീയേറ്ററുകളിൽ പ്രദർശനം തുടരുകയാണ്. യുവ താരം ടോവിനോ തോമസ് നായക വേഷത്തിൽ എത്തിയിരിക്കുന്ന ഈ ചിത്രം സംവിധായകൻ സലിം അഹമ്മദിന്റെ ആത്മ കഥാംശം കൂടി ഉള്ള ചിത്രമാണ്. തന്റെ ആദ്യ ചിത്രമായ ആദാമിന്റെ മകൻ അബു എടുക്കാൻ അദ്ദേഹം നടത്തിയ പരിശ്രമങ്ങളും അതിനു ശേഷം ഇന്ത്യയുടെ ഒഫീഷ്യൽ ഓസ്കാർ എൻട്രി ആയി ആ ചിത്രം തിരഞ്ഞെടുക്കപെട്ടപ്പോൾ അതുമായി ഹോളിവുഡിലേക്ക് പോയപ്പോൾ അദ്ദേഹത്തിന് ഉണ്ടായ അനുഭവങ്ങളുമാണ് ഈ ചിത്രം പറയുന്നത്.

ഇസഹാക് ഇബ്രാഹിം എന്ന കേന്ദ്ര കഥാപാത്രമായ യുവ സംവിധായകനായി ടോവിനോ തോമസ് ഗംഭീര പ്രകടനമാണ് ഈ ചിത്രത്തിൽ നടത്തിയിരിക്കുന്നത്. ടോവിനോയുടെ കരിയർ ബെസ്റ്റ് പെർഫോമൻസാണ് ഈ ചിത്രത്തിൽ കാണാൻ സാധിക്കുക എന്നാണ് പ്രശസ്ത നടൻ സലിം കുമാർ പറയുന്നത്. അദ്ദേഹവും ഈ ചിത്രത്തിൽ ഒരു നിർണ്ണായക വേഷം അവതരിപ്പിച്ചിട്ടുണ്ട്. സലിം അഹമ്മദിന്റെ നാല് ചിത്രങ്ങളിലും അഭിനയിച്ചിട്ടുള്ള സലിം കുമാർ ആണ് ആദാമിന്റെ മകൻ അബുവിലെ നായകൻ. ആ ചിത്രത്തിലെ പ്രകടനത്തിന് സലിം കുമാറിന് മികച്ച നടനുള്ള ദേശീയ പുരസ്‍കാരവും ലഭിച്ചിരുന്നു. സലിം അഹമ്മദ് തന്നെ രചനയും നിർവഹിച്ചിരിക്കുന്ന ആൻഡ് ദി ഓസ്കാർ ഗോസ് ടുവിലെ നായികാ വേഷം ചെയ്തിരിക്കുന്നത് അനു സിതാര ആണ്. സിദ്ദിഖ്, വിജയ രാഘവൻ, ശരത് കുമാർ, വിജയ രാഘവൻ, ജാഫർ ഇടുക്കി, ലാൽ എന്നിവരും ഈ ചിത്രത്തിന്റെ ഭാഗം ആണ്.