നവ്യ നായർ- വിനായകൻ ചിത്രം; ഒരുങ്ങുന്നത് ത്രില്ലറായി..!

പ്രശസ്ത നായിക നവ്യ നായർക്കൊപ്പം ഒരിക്കൽ കൂടിയെത്തുകയാണ് നടൻ വിനായകൻ. ഇവരെ നേരത്തെ ഒരുമിച്ചു കണ്ടിട്ടുള്ള ചതിക്കാത്ത ചന്തു ഒരു കോമഡി ചിത്രമാണെങ്കിൽ ഇത്തവണ ഒരു ത്രില്ലർ ആണ് ഒരുങ്ങുന്നത്. ഒരു വലിയ ഇടവേളയ്ക്കു ശേഷമാണു നവ്യ നായർ നായികാ വേഷം ചെയ്തു കൊണ്ട് ഒരു ചിത്രം വരുന്നത്. വി കെ പ്രകാശ് സംവിധാനം ചെയ്യുന്ന ഈ ചിത്രത്തിന്റെ പേര് ഒരുത്തി എന്നാണ്. ഒരു പോലീസ് ഓഫീസർ ആയാണ് വിനായകൻ ഈ ചിത്രത്തിൽ അഭിനയിക്കുന്നത്. ഷൂട്ടിംഗ് കഴിഞ്ഞ ഈ ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ ആണ് ഇപ്പോൾ നടന്നു കൊണ്ടിരിക്കുന്നത്. എസ് സുരേഷ് ബാബു തിരക്കഥ രചിച്ചിരിക്കുന്ന ഈ ചിത്രത്തിന്റെ ടാഗ് ലൈൻ ദ ഫയര്‍ ഇന്‍ യു എന്നാണ്.

ഇനി വിനായകൻ ഉൾപ്പെടെയുള്ള താരങ്ങളുടെ ഡബ്ബിങ് പൂർത്തിയാവാനുണ്ട് എന്നും ചിത്രം അതിന്റെ നിർമ്മാണത്തിന്റെ അവസാന ഘട്ടത്തിലാണെന്നും സംവിധായകൻ വി കെ പ്രകാശ് അറിയിച്ചതായി മാധ്യമങ്ങൾ റിപ്പോർട്ട് ചെയ്യുന്നു. ഒരു വീട്ടമ്മയുടെ മൂന്ന് ദിവസത്തെ ഓട്ടപ്പാച്ചിലിന്റെ കഥയാണ് ഈ ചിത്രം പറയുന്നതെന്നാണ് സൂചന. നവ്യാ നായര്‍ അവതരിപ്പിക്കുന്ന മണി എന്ന് പേരുള്ള ഇടത്തരക്കാരിയായ ഒരു വീട്ടമ്മയുടെ കഥയാണ് ഈ ചിത്രം അവതരിപ്പിക്കുന്നത്. ജിംഷി ഖാലിദ് ക്യാമറ ചലിപ്പിച്ച ഈ ചിത്രം നിർമ്മിക്കുന്നത് ബെന്‍സി പ്രൊഡക്ഷന്‍സാണ്. ഇതിനു വേണ്ടി സംഗീതം ഒരുക്കിയിരിക്കുന്നത് പ്രശസ്ത സംഗീത സംവിധായകൻ ഗോപി സുന്ദറും തകര ബാൻഡും ചേർന്നാണ്. ലിജോ പോൾ എഡിറ്റിംഗ് നിർവഹിച്ചിരിക്കുന്ന ഈ ചിത്രത്തിൽ സൈജു കുറുപ്പ്, സന്തോഷ് കീഴാറ്റൂര്‍, മുകുന്ദന്‍, ജയശങ്കര്‍, മനുരാജ്, മാളവിക,കൃഷ്ണപ്രസാദ് എന്നിവരും അഭിനയിച്ചിരിക്കുന്നു.