ആ ഹോളിവുഡ് ചിത്രത്തിന്റെ തിരക്കിൽ മലയാളത്തിന്റെ പവർ സ്റ്റാർ ബാബു ആന്റണി..!

മലയാളത്തിന്റെ ആക്ഷൻ സ്റ്റാർ ആയ ബാബു ആന്റണി ഒരു വലിയ തിരിച്ചു വരവിനാണിപ്പോൾ ഒരുങ്ങുന്നത്. ഒരു വലിയ ഇടവേളയ്ക്കു ശേഷം നായകനായി മലയാളത്തിൽ എത്തുകയാണ് ബാബു ആന്റണി. ഒമർ ലുലു ഒരുക്കാൻ പോകുന്ന പവർ സ്റ്റാർ എന്ന ബിഗ് ബജറ്റ് മാസ്സ് ചിത്രത്തിലാണ് ബാബു ആന്റണി നായകനാവുന്നത്. ഹോളിവുഡ് താരങ്ങളടക്കം അണിനിരക്കുന്ന ഈ ചിത്രം രചിക്കുന്നത് മലയാളത്തിലെ എവർഗ്രീൻ സൂപ്പർ ഹിറ്റുകൾ രചിച്ചിട്ടുള്ള ഡെന്നിസ് ജോസഫാണ്. ബാബു ആന്റണിക്ക് ഒപ്പം അബു സലിം, ബാബു രാജ്, റിയാസ് ഖാൻ തുടങ്ങിയവരും അഭിനയിക്കുന്ന ഈ ചിത്രത്തിന്റെ ബഡ്ജറ്റ് പത്തു കോടിക്ക് മുകളിലാണ് എന്ന റിപ്പോർട്ടുകളും വന്നിരുന്നു. ഹാപ്പി വെഡിങ്, ചങ്ക്‌സ്, ഒരു അടാർ ലവ്, ധമാക്ക എന്നീ ചിത്രങ്ങൾക്ക് ശേഷം ഒമർ ലുലു ഒരുക്കാൻ പോകുന്ന ഈ ചിത്രത്തിൽ പാട്ടുകൾ ഉണ്ടാവില്ല എന്നും സംവിധായകൻ അറിയിച്ചിരുന്നു. ഇപ്പോഴിതാ മലയാളത്തിൽ മാത്രമല്ല ഹോളിവുഡ് ചിത്രത്തിലും അഭിനയിക്കുകയാണ് ബാബു ആന്റണി.

ബുള്ളെറ്റ് ബ്ളേഡ്‌സ് ആൻഡ് ബ്ലഡ് എന്ന ഹോളിവുഡ് ചിത്രത്തിന്റെ തിരക്കിലാണ് ഇപ്പോൾ ബാബു ആന്റണി. അതിനൊപ്പം ബോളിവുഡിൽ നിന്നും ഒരുപിടി മികച്ച അവസരങ്ങൾ തന്നെ തേടി വന്നിട്ടുണ്ട് എന്നും അദ്ദേഹം പറഞ്ഞു. ഏതായാലും തൊണ്ണൂറുകളിൽ തന്റെ ആക്ഷൻ കൊണ്ട് തെന്നിന്ത്യയിലെ യുവാക്കളെ ത്രസിപ്പിച്ച ബാബു ആന്റണി ഒരു വമ്പൻ തിരിച്ചു വരവ് ഉറപ്പിച്ചു കൊണ്ട് തന്നെയാണ് മുന്നോട്ടു പോകുന്നത്. പവർ സ്റ്റാർ എന്ന ചിത്രത്തിന്റെ കഥാ പശ്ചാത്തലം കൊക്കെയ്‍ന്‍ വിപണിയാണ് എന്നും, മംഗലാപുരവും കാസര്‍ഗോഡും കൊച്ചിയുമാണ് ലൊക്കേഷനുകള്‍ എന്നും നേരത്തെ റിപ്പോർട്ടുകൾ വന്നിരുന്നു.