കുടുംബ ബന്ധങ്ങളിലേക്കുള്ള വാതിൽ നാളെ തുറക്കുന്നു; വിനയ് ഫോർട്ട് – അനു സിതാര ചിത്രം ഇന്ന് മുതൽ.

പ്രശസ്ത താരങ്ങളായ വിനയ് ഫോർട്ട്, അനു സിതാര എന്നിവരെ കേന്ദ്ര കഥാപാത്രങ്ങളാക്കി സർജു രമാകാന്ത് സംവിധാനം ചെയ്ത ചിത്രമാണ് വാതിൽ. ഒരു ഫാമിലി എന്റർടൈനറായി ഒരുക്കിയിരിക്കുന്ന ഈ ചിത്രം ഇന്ന് മുതൽ പ്രേക്ഷകരുടെ മുന്നിലേക്ക് എത്തുകയാണ്. ഇതിന്റെ അഡ്വാൻസ് ബുക്കിംഗ് നേരത്തെ തന്നെ ആരംഭിച്ചിരുന്നു. വിനയ് ഫോർട്ട്, അനു സിതാര എന്നിവർക്കൊപ്പം കൃഷ്ണ ശങ്കറും പ്രധാന വേഷം ചെയ്യുന്ന ഈ ചിത്രത്തിൽ സുനിൽ സുഖദ, ഉണ്ണിരാജ്, അബിൻ ബിനോ, വി കെ ബൈജു, പോളി, മെറിൻ ഫിലിപ് എന്നിവരും നിർണ്ണായക കഥാപാത്രങ്ങൾക്ക് ജീവൻ പകർന്നിട്ടുണ്ട്. ഷംനാദ് ഷമീർ തിരക്കഥ രചിച്ച ഈ ചിത്രത്തിന് കാമറ ചലിപ്പിച്ചത് മനേഷ് മാധവനും സംഗീതമൊരുക്കിയത് സെജോ ജോണുമാണ്.

നേരത്തെ റിലീസ് ചെയ്ത ഇതിലെ രണ്ട് ഗാനങ്ങൾ മികച്ച പ്രേക്ഷക ശ്രദ്ധ നേടിയെടുത്തിരുന്നു. അതിൽ തന്നെ റാപ് കൂട്ടിച്ചേർത്ത ജീവിതമെന്ന തമാശ എന്ന വരികളോടെ തുടങ്ങുന്ന ഗാനം സോഷ്യൽ മീഡിയയിൽ ഏറെ ശ്രദ്ധ നേടി. സ്പാർക്‌ പിക്‌ചേഴ്‌സിന്റെ ബാനറിൽ സുജി കെ ഗോവിന്ദരാജ് നിർമ്മിച്ചിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് പരിചയ സമ്പന്നനായ ജോൺ കുട്ടിയാണ്. രജീഷ് വളാഞ്ചേരിയാണ് വാതിലിന്റെ സഹനിർമ്മാതാവ്. ഈ ചിത്രത്തിന്റെ ട്രെയിലറിനും മികച്ച സ്വീകരണമാണ് പ്രേക്ഷകർ നൽകിയത്. കുടുംബ പ്രേക്ഷകർക്ക് പൂർണ്ണ സംതൃപ്തി നൽകുന്ന ചിത്രമായിരിക്കുമിതെന്ന സൂചനയാണ് ഇതിന്റെ ടീസർ, ട്രൈലെർ എന്നിവയിലൂടെ ലഭിക്കുന്നത്. ഒരിടവേളക്ക് ശേഷം അനു സിത്താരയെ നായികാ വേഷത്തിൽ കാണാൻ സാധിക്കുന്ന ചിത്രം കൂടിയാണെന്നതും വാതിലിന്റെ പ്രത്യേകതയാണ്.