മമ്മൂട്ടിക്കും ദുൽഖറിനും ശേഷം ആ നേട്ടവുമായി ഉലക നായകൻ

ഉലക നായകൻ കമൽ ഹസൻ നായകനായി എത്തുന്ന ഏറ്റവും പുതിയ ചിത്രമാണ് വിക്രം. ജൂൺ മൂന്നിന് ആഗോള റിലീസാവാൻ പോകുന്ന ഈ ചിത്രം സംവിധാനം ചെയ്തിരിക്കുന്നത്, മാനഗരം, കൈതി, മാസ്റ്റർ എന്നീ വമ്പൻ ഹിറ്റുകൾ നമ്മുക്ക് സമ്മാനിച്ച ലോകേഷ് കനകരാജ് ആണ്. അദ്ദേഹവും രത്ന കുമാറും ചേർന്ന് രചിച്ച ഈ മാസ്സ് ആക്ഷൻ ത്രില്ലർ ചിത്രം നിർമ്മിച്ചിരിക്കുന്നത്, രാജ് കമൽ ഇന്റർനാഷനലിന്റെ ബാനറിൽ കമൽ ഹാസൻ തന്നെയാണ്. അദ്ദേഹത്തോടൊപ്പം ഫഹദ് ഫാസിൽ, വിജയ് സേതുപതി, നരെയ്ൻ, ചെമ്പൻ വിനോദ്, കാളിദാസ് ജയറാം, അർജുൻ ദാസ് എന്നിവരും വേഷമിട്ടിരിക്കുന്ന ഈ ചിത്രത്തിൽ അതിഥി വേഷത്തിൽ നടിപ്പിൻ നായകൻ സൂര്യയും എത്തിയിട്ടുണ്ട്. വമ്പൻ പ്രൊമോഷണൽ പരിപാടികളാണ് ഈ ചിത്രത്തിന് വേണ്ടി ഇപ്പോൾ ഓൺലെനായും ഓഫ്‌ലൈനായും നടന്നു കൊണ്ടിരിക്കുന്നത്. ഇപ്പോഴിതാ അതിന്റെ ഭാഗമായി ഈ ചിത്രത്തിന്റെ ട്രൈലെർ ദുബായിൽ സ്ഥിതി ചെയ്യുന്ന, ലോകത്തെ ഏറ്റവും വലിയ കെട്ടിടമായ ബുർജ് ഖലീഫയിൽ പ്രദർശിപ്പിച്ചു.

നേരത്തെ മലയാള സിനിമയിൽ നിന്ന് ദുൽഖർ സൽമാന്റെ കുറുപ്പ്, മമ്മൂട്ടിയുടെ സിബിഐ 5 തുടങ്ങിയ ചിത്രങ്ങളുടെ ട്രൈലെർ അവിടെ പ്രദർശിപ്പിച്ചിരുന്നു. ഒരു സെക്കന്റിനു ഇത്ര ലക്ഷമെന്ന കണക്കിൽ പണമടച്ചാണ്‌ അവിടെ സിനിമകളുടെ ട്രൈലെർ, ടീസർ എന്നിവ പ്രദർശിപ്പിക്കുന്നത്. ഏതായാലും ആദ്യമായാണ് ഉലക നായകൻ കമൽ ഹസൻ നായകനാവുന്ന ഒരു ചിത്രത്തിന്റെ ട്രൈലെർ ബുർജ് ഖലീഫയിൽ പ്രദർശിപ്പിക്കുന്നത് എന്ന പ്രത്യേകതയുമുണ്ട്. ഈ ചിത്രത്തിന്റെ ഗംഭീര ട്രൈലെർ വലിയ ഹൈപ്പാണ്‌ ഇതിനോടകം സൃഷ്ടിച്ചിരിക്കുന്നത്. അനിരുദ്ധ് രവിചന്ദർ ഈണം നൽകിയ ഇതിലെ ഗാനങ്ങളും ഇതിനോടകം സൂപ്പർ ഹിറ്റായി കഴിഞ്ഞു.