ആ വമ്പൻ മിഷൻ വീണ്ടുമാരംഭിക്കാൻ വിക്രം- ഗൗതം വാസുദേവ് മേനോൻ ടീം

തമിഴകത്തിന്റെ സൂപ്പർ താരങ്ങളിലൊരാളായ ചിയാൻ വിക്രമിനെ നായകനാക്കി ഗൗതം വാസുദേവ് മേനോൻ ഏതാനും വർഷങ്ങൾക്കു മുന്പാരംഭിച്ച ചിത്രമാണ് ധ്രുവ നച്ചത്തിരം. ഇതിന്റെ ടീസറുകൾ, ഇതിലെ ഒരു ഗാനം എന്നിവ റിലീസ് ചെയ്യുകയും വലിയ പ്രേക്ഷക ശ്രദ്ധ നേടുകയും ചെയ്തിരുന്നു. എന്നാൽ ഇതിന്റെ ഷൂട്ടിംഗ് ഇടയ്ക്കു നിന്ന് പോവുകയും, ശേഷം കോവിഡ് പ്രതിസന്ധി കൂടി വന്നതോടെ ചിത്രീകരണം വീണ്ടുമാരംഭിക്കാൻ പറ്റാത്ത സാഹചര്യമുണ്ടാവുകയും ചെയ്തു. ഇപ്പോഴിതാ ഈ ചിത്രം പൂർത്തിയാക്കാനുള്ള ഒരുക്കത്തിലാണ് വിക്രം- ഗൗതം വാസുദേവ് മേനോൻ ടീമെന്ന റിപ്പോർട്ടുകളാണ് വരുന്നത്. കഴിഞ്ഞ ദിവസം ഇത് സംബന്ധിച്ച ചർച്ചകൾക്കായി ഇരുവരും കൂടിക്കാഴ്ച നടത്തുകയും ചെയ്തു. ആ സമയത്തെ ഇവരുടെ ചിത്രങ്ങൾ ഇപ്പോൾ സോഷ്യൽ മീഡിയയിൽ വൈറലാണ്.

ഐശ്വര്യ രാജേഷും റിതു വർമയും നായികാ വേഷങ്ങൾ ചെയ്യുന്ന ഈ ചിത്രത്തിൽ മലയാള നടൻ വിനായകനും അഭിനയിച്ചിട്ടുണ്ടെന്നു വാർത്തകൾ വന്നിരുന്നു. ഇവർക്കൊപ്പം സിമ്രാൻ, രാധിക ശരത് കുമാർ, പാർത്ഥിപൻ, ദിവ്യ ദർശിനി, വംശി കൃഷ്ണ എന്നിവരും ഈ ചിത്രത്തിന്റെ താര നിരയിലുണ്ട്. അന്താരാഷ്ട്ര നിലവാരത്തിൽ ഒരുക്കുന്ന ഈ ആക്ഷൻ ത്രില്ലറിൽ ജോണെന്നു പേരുള്ള ഒരു റോ ഏജന്റ് ആയാണ് വിക്രം അഭിനയിക്കുന്നത്. ഗൗതം മേനോന്റെ നിർമ്മാണ കമ്പനിയോടൊപ്പം എസ്‌കേപ്പ് ആര്ടിസ്റ് പിക്ചർസ് കൂടി ചേർന്ന് നിർമിക്കുന്ന ഈ ചിത്രത്തിന്റെ ഹൈലൈറ്റ് ഇതിലെ ഹൈ വോൾട്ടേജ് സ്റ്റണ്ട് രംഗങ്ങളായിരിക്കുമെന്നും റിപ്പോർട്ടുകൾ സൂചിപ്പിക്കുന്നു. ഹാരിസ് ജയരാജ് സംഗീതമൊരുക്കിയ ഈ ചിത്രത്തിന് ക്യാമറ ചലിപ്പിക്കുന്നത് മനോജ് പരമഹംസയാണ്. ഗൗതം വാസുദേവ് മേനോൻ തന്നെ രചിച്ച ഈ ചിത്രത്തിന് ഒന്നിലധികം ഭാഗങ്ങൾ ഉണ്ടാവുമെന്നും വാർത്തകൾ വന്നിരുന്നു.